У Чорным моры ў ноч на 26 сакавіка адбыўся выбух на борце нафтавага танкера Altura, які рухаўся з Расеі і належыць турэцкай кампаніі.
Паводле турэцкіх мэдыя, выбух на танкеры адбыўся, калі ён быў прыкладна за 25 кілямэтраў ад праліву Басфор. Вадаплаў накіроўваўся з Новарасійску ў Стамбул пад сьцягам Сьера-Леонэ. Сьцьвярджаюць, што выбухам былі пашкоджаныя кабіна стырнавога і машыннае аддзяленьне, у спод пачала пранікаць вада.
Да танкера накіравалі выратавальны карабель. Паведамляюць, што на борце каманда з 27 чалавек — грамадзян Турэччыны. Аб пацярпелых не паведамлялі.
Турэцкія мэдыя пішуць, што Altura перавозіла 140 тысяч тон нафты. Карабель знаходзіцца пад санкцыямі ЭЗ і Вялікай Брытаніі, а таксама Ўкраіны. Лёндан уключыў танкер у санкцыйны сьпіс 24 лютага 2026 году разам зь іншымі танкерамі «ценевага флёту» — вадаплавамі, што перавозяць расейскую нафту пад сьцягамі трэціх краін.
Раней украінскія морскія бесьпілётнікі атакавалі танкеры або газавозы «ценевага флёту» як у Чорным, так і ў Міжземным моры. Украіна пакуль не камэнтавала сытуацыю з танкерам Altura.
ГЛЯДЗІЦЕ ТАКСАМА: Reuters: удары вывелі з ладу 40% магутнасьцяў Расеі ў экспарце нафты