Сьвет у лічбах і фотаздымках. 28 красавіка
Каля 20 мільёнаў чалавек, паводле прыблізных ацэнак, сёньня зьяўляюцца ахвярамі гандлю людзьмі. Сучасных нявольнікаў выкарыстоўваюць у асноўным на шахтах, будоўлях, у сэкс-індустрыі і як хатнюю прыслугу.
31000 37 чалавек - столькі імігрантаў прыбыло ў Грэцыю за першыя шэсьць месяцаў 2015 году. Гэта ў 10 разоў больш, чым за той жа пэрыяд летась.
Ад 1,4 да 2,3 кіляграмаў вагі набіраюць мужчыны, калі ўпершыню становяцца бацькамі. Такія дадзеныя апошняга дасьледаваньня, праведзенага ў ЗША на падставе вывучэньня 10 тысяч мужчын. Прыкладна тры чвэрці амэрыканскіх мужчын маюць залішнюю вагу або хворыя на атлусьценьне.
Толькі 8 адсоткаў насельніцтва Туркмэністану паліць. Гэта, паводле дадзеных СААЗ, самы нізкі паказчык у сьвеце. У Туркмэністане продаж тытунёвых вырабаў строга абмежаваны і лімітаваны.
На працягу 15 гадоў Гары Каспараў быў чэмпіёнам сьвету па шахматах. Нядаўна Гары Каспарава як апазіцыянэра і крытыка прэзыдэнта Пуціна выключылі з клюбу "Спартак", дзе ён дзесяцігодзьдзямі быў ганаровым членам.
На працягу 54 гадоў паміж ЗША і Кубай не было дыпляматычных адносін. Амбасады ў Вашынгтоне і Гаване зноў адкрыліся сёлета 20 ліпеня.
4 мільёны жыхароў Сырыі былі вымушаныя ўцячы за мяжу ад моманту пачатку ў краіне ў 2011 годзе грамадзянскай вайны.
Каля 1 году цяпер павінна прайсьці, каб Іран назапасіў колькасьць узбагачанага ўрану, дастатковага для вырабу 1 атамнай бомбы. Такія ўмовы новага пагадненьня, заключанага нядаўна паміж Тэгеранам і 6 вядучымі сусьветнымі дзяржавамі. Раней лічылася, што Іран мог дамагчыся гэтага на працягу 2-3 месяцаў.
1682 дні - столькі ўжо знаходзіцца за кратамі кандыдат у прэзыдэнты Беларусі на выбарах 2010 году Мікалай Статкевіч.
10 даляраў ЗША - на такую або меншую суму ў дзень жыве 71 працэнт насельніцтва Зямлі.
1 мільён 800 тысяч таджыкаў працуюць і жывуць за мяжой, пры агульным насельніцтве краіны ў 8 мільёнаў чалавек.