Скульптар пачаў перарабляць кампазыцыю «Жанчыне-маці» ў Быхаве пасьля крытыкі і жартаў у сацсетках

Скультура ў Быхаве Магілёўскай вобласьці. 6 лістапада 2026

У гарадзкім парку Быхава над кампазыцыяй жанчыны і хлопчыка, якая зьявілася тут у лістападзе, паставілі намёт, і яе аўтар Аляксандр Мінькоў пачаў перарабляць фігуры.

Улады Быхава пасьля грамадзкага рэзанансу абавязалі выправіць гранітную скульптуру «Жанчыне-маці».

Як паказалі ў сюжэце дзяржаўнага тэлеканалу СТБ, магілёўскі скульптар Аляксандр Мінькоў проста ў гарадзкім парку з дапамогай балгаркі счасаў першапачатковы перакошаны твар статуі і пачаў выразаць новы твар.

Пры гэтым Мінькоў заявіў, што рабіў помнік як хуткую пленэрную работу ў падарунак гораду:

«Ну, хочаце акадэмічнае мастацтва — ну дайце мне круглую суму і год у запасе, і будзе вам любы шэдэўр, які рабіў Мікеланджэла. І Мікеланджэла таксама, дарэчы, з ягонай работай, якую ён рабіў пяць гадоў, „Давідам“ — і таксама незадаволеных было вельмі шмат!»

Загадчыца сэктару культуры Быхаўскага райвыканкама Людміла Кечык у эфіры СТВ паведаміла, што разыходжаньне скульптуры з эскізным праектам было выяўлена «ў ходзе адкрыцьця» кампазыцыі.

Цяпер супрацоўніцтва са скульптарам па іншых праектах паставілі на паўзу, а лёс абпілаванай статуі мусіць вырашыць спэцыяльная камісія, паведаміў тэлеканал СТВ.

Што адбылося і чаму вырашылі перарабляць

Пасьля ўрачыстага адкрыцьця, прымеркаванага да Года беларускай жанчыны, карыстальнікі сацсетак раскрытыкавалі прапорцыі фігур.

Шмат заўваг выклікалі рысы твару жанчыны, уражаньне адсутнасьці шыі, адзеньне хлопчыка і другая каса на сьпіне.

ГЛЯДЗІЦЕ ТАКСАМА:

Лукашэнка, Пуцін і кацяняты. Даносы і прысуд Васінай. Скандальны помнік у Быхаве. Відэанавіны 10 лістапада