Як паведаміла агенцтва AFP, Іліяна Ётава — паплечніца прэм’ер-міністра Румэна Радэва, у вечары 1 лістапада ў яго прысутнасьці яна заявіла аб сваёй перамозе.
«Сёньня баўгарскі народ абраў будучыню, а не мінулае. [...] Людзі зрабілі выбар на карысьць нармальнага жыцьця і стабільнага, яснага шляху наперад», — заявіў Радэў, які таксама выступае за дыялёг з Масквой.
Паводле ацэнак некалькіх сацыялягічных службаў, Ётава набрала ад 57,4% да 58,2% галасоў, значна апярэдзіўшы іншага кандыдата, колішняга намесьніка кіраўніка Баўгарскага нацыянальнага банку Андрэя Гюрава, які атрымаў ад 38,6% да 39,6%.
Андрэй Гюраў заявіў журналістам, што прымае «вынікі такімі, якія яны ёсьць». «Мы стварылі трывалы падмурак, на якім можна будаваць далей», — сказаў ён.
Старшыня Эўрапейскай камісіі Урзуля фон дэр Ляен павіншавала Ётаву.
«Ад пытаньняў бясьпекі і абароны да нашай канкурэнтаздольнасьці і энэргетычнай незалежнасьці — я спадзяюся на працяг нашай супольнай працы. Дзеля моцнай Баўгарыі ў моцнай Эўропе», — напісала фон дэр Ляен у сацыяльнай сетцы X.
ГЛЯДЗІЦЕ ТАКСАМА:
Сэрбія, Баўгарыя і Бразылія выбіраюць уладу: што залежыць ад вынікаў галасаваньняШто папярэднічала і чаму гэта важна
Выбары праходзілі падчас сэрыі атак бесьпілётнікаў на гандлёвыя караблі ў Чорным моры, што выклікала трывогу наконт бясьпекі.
У кастрычніку ў Чорным моры, недалёка ад берагоў Баўгарыі, пацярпелі некалькі караблёў; 21 чалавека лічаць зьніклымі бязь вестак. Мяркуюць, што гэтыя падзеі сталі вынікам расейска-ўкраінскай вайны.
Хоць левацэнтрыст Румэн Радэў заявіў, што напады, падобна, адпавядаюць інтарэсам Расеі (і нават выклікаў расейскага пасла), урад Баўгарыі падкрэсьлівае, што пакуль няма доказаў, якія б наўпрост зьвязвалі гэтыя інцыдэнты з Масквой.
У выніку выбараў 62-гадовая Ётава стала першай жанчынай-прэзыдэнтам, абранай у краіне з насельніцтвам 6,4 мільёна чалавек. Гюраў, 50-гадовы былы намесьнік кіраўніка Баўгарскага народнага банку, заявіў журналістам, што прымае «вынікі такімі, якія яны ёсьць».
Ётава — былая журналістка і дэпутат Эўрапейскага парлямэнту; яна абіралася на пасаду віцэ-прэзыдэнта разам з Радэвым у 2016 і 2021 гадах.