Кіраўніка аднаго з прадпрыемстваў Віцебскай вобласці затрымалі з доказамі злачынства пры атрыманьні хабару, сьцьвярджаюць у прэс-службе МУС.
Як гаворыцца ў афіцыйным камэнтары, затрыманьне ажыцьцявілі апэратыўнікі Аддзелу барацьбы з эканамічнымі злачынствам пры падтрымцы байцоў АМАПу.
У паведамленьні сказана, што гэта затрыманьне адбылося на адным зь мясаперапрацоўчых прадпрыемстваў Віцебскай вобласьці, а фігурант — жыхар Барысава.
Як высьветліла «Наша Ніва», гаворка пра кіраўніка Аршанскага мясакансэрвавага камбінату Паўла Рынзака. Рынзак родам якраз з Барысава.
Раней Рынзак працаваў намесьнікам начальніка на Барысаўскім камбінаце хлебапрадуктаў.
Паводле даных міліцыі, хабар кіраўнік атрымаў за забесьпячэньне перамогі канкрэтнай камэрцыйнай фірмы ў працэдуры закупак транспартных паслуг для патрэб камбінату.
Сума хабару нібыта склала 6 тысяч рублёў.
Цяпер МУС займаецца праверкай на прадмет іншых падобных эпізодаў з удзелам затрыманага. Там ужо завялі супраць яго крымінальную справу.
Хуткія перамены
Яшчэ ў жніўні 2026 году Павал Рынзак асабіста сустракаў на прадпрыемстве прэм'ер-міністра Аляксандра Турчына і ў размове зь дзяржаўнай прэсай хваліўся новымі аўтаматызаванымі лініямі, пераходам дзіцячага харчаваньня з бляшанак на шкляны посуд і планамі выпускаць кармы для жывёлаў.
На гэты момант невядома, ці ўжо тады Рынзак быў у апэратыўнай распрацоўцы, ці яго пачалі падазраваць у хабарніцтве пазьней.
Хабарніцтва на мясакамбінатах
Выпадак Рынзака — ня першая хабарніцкая крымінальная справа ў Беларусі з дырэктарамі мясакамбінатаў.
У канцы верасьня Вярхоўны суд Беларусі вынес прысуд у справе колішняга генэральнага дырэктара Горадзенскага мясакамбінату Алега Іванова. Яго асудзілі паводле ч. 2 і ч. 3 артыкулу 430 Крымінальнага кодэксу (атрыманьне хабару) на 7 гадоў пазбаўленьня волі з штрафам у памеры 5 тысяч базавых велічынь (225 тыс. рублёў) і пазбаўленьнем на 5 гадоў права займаць пасады, зьвязаныя з выкананьнем арганізацыйна-распарадчых і адміністрацыйна-гаспадарчых абавязкаў.
Згодна з інфармацыяй Генпракуратуры, абвінавачаны з 1 ліпеня 2019 году да 28 траўня 2025-га «атрымаў у якасьці незаконнага ўзнагароджаньня ад кіраўнікоў прыватных арганізацый крыптавалюту і гатоўку ў суме прыблізна 1,8 млн рублёў». Грошы перадавалі яму за арганізацыю закупак комплексных харчовых дабавак і працягу іх выкарыстаньня ў вытворчай дзейнасьці мясакамбіната.
Гэта ня першае затрыманьне кіраўніка й на адным Аршанскім мясакамбінаце. У 2015-м, напрыклад, у падазрэньнях у хабары затрымлівалі былога дырэктара камбінату Сяргея Качанава.
А яшчэ раней, у 2012-м, групу кіраўнікоў судзілі за скажэньне статыстыкі і вывядзеньне 2 млн даляраў з актываў прадпрыемства.