Цяпер старонка дапоўненая і адноўленая. Па адрасе marakou.com можна прачытаць укладзеныя дасьледнікам даведнікі, а таксама аўтарскую прозу Леаніда Маракова. Таксама на сайце можна пазнаёміцца з паэзіяй роднага дзядзькі дасьледніка — Валера Маракова, расстралянага ў чорную ноч 29 кастрычніка 1937 году.
Аднаўленьне старонкі стала магчымым дзякуючы Клюбу беларускіх мэцэнатаў і асабіста Івану Бахціну, паведаміў у фэйсбуку кіраўнік Беларускай рады культуры Сяргей Будкін.
«Асобная падзяка Зьмітру, сыну Леаніда, з дазволу якога была праведзена гэтая праца. Гэта падзея. Вяртаецца цэлы пласт беларускай гістарычнай памяці».
Хто такі Леанід Маракоў
Леанід Маракоў — беларускі энцыкляпэдыст, дасьледнік, пісьменьнік, які выдаў шэраг кніг пра рэпрэсаваных у Беларусі людзей, а таксама пра камуністычных карнікаў, якія чынілі злачынствы.
Памёр у 2016 годзе пасьля хваробы і пахаваны на Заходніх могілках у родным Менску.
Свой сайт пра рэпрэсіі Леанід Маракоў адкрыў яшчэ ў 2008 годзе. З таго часу сабраная базу кніг і імёнаў пастаянна папаўнялася. Цяпер у сьпісах больш за 4000 настаўнікаў, 3000 каталіцкіх і праваслаўных сьвятароў, 1500 мэдыцынскіх і вэтэрынарных работнікаў, больш за 1000 літаратараў і навукоўцаў, многія тысячы іншых дзеячаў культуры, грамадзтва, прамысловасьці Беларусі.
Старонка працуе на трох мовах — беларускай, расейскай і ангельскай.