Пасьля працоўнага тыдня ў Нью-Ёрку падчас Генэральнай Асамблеі ААН Сьвятлана Ціханоўская паказала ў сацсетках, як праводзіць нядзелю — у спартзалі.
Спорт стаў часткай яе жыцьця пасьля таго, як зімой 2024 году яна пачала займацца боксам. У інтэрвію праграме «Жыцьцё-маліна» яна расказвала, што ў цяжкі псыхалягічны пэрыяд ёй параілі паспрабаваць трэніроўкі.
«Мне спадабалася, што там можна абстрагавацца ад сытуацыі, не праклінаючы сябе за тое, што ты робіш нешта недарэчнае ў нейкім кантэксьце. І пачалося ўсё з боксу».
Пазьней Ціханоўская таксама расказвала пра ёгу, групавыя заняткі і стральбу ў ціры. Трэніроўкі дапамагаюць ёй трымаць сябе ў форме і здымаць нэгатыўную энэргію, кажа яна.
Сёлета ў жніўні яна падаравала свае першыя баксёрскія пальчаткі на дабрачынны розыгрыш перад футбольным турнірам памяці Мікіты Мелказёрава ў Варшаве.