Па выніках жніўня на другасным рынку стала вядома, што ў Менску падпісалі каля 1180 угодаў. Гэта прыкладна на 5% менш, чым у ліпені, і адразу на 21% менш, чым у жніўні летась, піша realt.by.
Агулам за восем месяцаў колькасьць угодаў прыкладна на 15% ніжэй, чым годам раней. Аднак сярэдняя цана квадратнага мэтру паводле рэальных угодаў у жніўні дасягнула каля $2295. За месяц яна вырасла на 2,7%, з пачатку году — прыкладна на 18%, а з пачатку 2025-га — прыкладна на 44%.
Асаблівасьць цяперашняга рынку ў тым, што ўгодаў становіцца менш, але прадаўцы ўсё яшчэ могуць павышаць цэны, бо кватэраў у продажы вельмі мала. Паводле дадзеных базы Realt, у жніўні прапанова крыху вырасла — на выбар пакупнікоў на працягу месяца было каля 5,63 тысячы кватэр супраць 5,4 тысячы ў ліпені. Але колькасьць унікальных кватэр непасрэдна на канец месяца амаль не зьмянілася.
Што гэта значыць
Прычыну экспэрты бачаць у вяртаньні пакупнікоў ад забудоўнікаў назад на другасны рынак. Гэта значыць, фактычны запас рынку ў момант застаецца практычна ранейшым, а пры сёньняшнім тэмпе продажаў усёй наяўнай прапановы тэарэтычна хапіла б менш чым на пяць месяцаў. Для рынку нерухомасьці гэта вельмі нізкі паказьнік, які і падтрымлівае рост цэн, тлумачаць адмыслоўцы.
Жнівень — звычайна даволі актыўны месяц для другаснага рынку — зламаў звыклую сэзоннасьць, і замест чаканага ўздыму продажы зьніжаліся. Адна зь відавочных прычынаў — масавае перамяшчэньне ўвагі пакупнікоў на новабудоўлі пасьля анонсу крэдытаў са стаўкай каля 1% на першыя два гады.
Але з крэдытам усё аказалася ня так проста. Па-першае, усьлед за ростам попыту забудоўнікі пачалі карэктаваць цэны. Па-другое, самыя прывабныя кватэры вельмі хутка ішлі з продажу, і сапраўдны выбар станавіўся меншым. Па-трэцяе, умовы крэдытаваньня аказаліся складанейшымі, чым выглядалі ў рэкляме. Напрыклад, паводле новых дамоваў з 21 жніўня ўвялі абмежаваньне на датэрміновае пагашэньне на працягу першых пяці гадоў.
У выніку частка патэнцыяльных пакупнікоў новабудоўляў не змагла або ўжо не захацела зьдзяйсьняць угоду і вяртаецца на другасны рынак.
Нягледзячы на вяртаньне попыту прапанова на рынку па-ранейшаму вельмі абмежаваная. Цэны, паводле прагнозу адмыслоўцаў, працягнуць расьці.