Паўднёвы акруговы вайсковы суд у Растове-на-Доне прызнаў вінаватым паводле некалькіх артыкулаў грамадзяніна Беларусі, які, як сьцьвярджаецца, на заданьне Службы бясьпекі Ўкраіны рыхтаваў падрыў пункту адбору на вайсковую службу па кантракце ў Новарасійску, перадаюць расейскія СМІ, у прыватнасьці «Интерфакс», з спасылкай на прэсавую службу суду.
Раней паведамлялася, што затрыманы — 2000 году нараджэньня.
Паводле сьледчых, у сьнежні 2024 году, калі ён быў у Краснадары, Мацьвей Кітоў пагадзіўся на супрацоўніцтва з асобай, якая прадставілася супрацоўнікам Службы бясьпекі Ўкраіны. А ў лютым 2025 году атрымаў заданьне ўзарваць пункт адбору на кантрактную службу ў Новарасійску і 805 даляраў на рэалізацыю тэракту.
У тым самым месяцы ён забраў з схованкі ў Новарасійску кампанэнты выбуховай прылады і перахаваў іх у іншым месцы, а таксама атрымаў інструкцыю па зборцы. Неўзабаве пасьля гэтага яго затрымалі і абвінавацілі па чатырох артыкулах Крымінальнага кодэксу Расеі:
- праходжаньне навучаньня з мэтай ажыцьцяўленьня тэрарыстычнай дзейнасьці,
- падрыхтоўка да ўчыненьня тэрарыстычнага акту,
- незаконныя набыцьцё, перадача, збыт, захоўваньне, перавозка, перасылка або нашэньне выбуховых рэчываў ці выбуховых прыладаў,
- аказаньне дапамогі праціўніку ў дзейнасьці, заведама накіраванай супраць бясьпекі Расеі.
Кітоў прызнаў віну. Апроч 25 гадоў зьняволеньня, суд аштрафаваў яго на больш як 3,5 тысячы даляраў у пераліку.
Першыя 5 гадоў тэрміну да адпраўкі ў калёнію строгага рэжыму яму давядзецца адбыць у турме.
ТАСС з спасылкай на ўправу ФСБ па Краснадарскім краі апублікавала відэа затрыманьня і сьледчых дзеяньняў з абвінавачаным. Год таму пашыраная вэрсія гэтага відэа выйшла на канале расейскага «Нацыянальнага антытэрарыстычнага камітэту». Прычым у апісаньні да ранейшага відэа — хутчэй за ўсё, памылкова — сьцьвярджалася, што затрыманы — грамадзянін Расеі 2009 году нараджэньня, датычны да падпалаў рэлейных шафаў і трансфарматарнай падстанцыі на чыгунцы.