Усе трое не прызналі сябе вінаватымі. Заключныя аргумэнты будуць прадстаўлены ў верасьні, калі і будзе вынесены прысуд, паведамляе польскі партал portalspozywczy.pl.
Усе трое абвінавачаных — жыхары Беластоку. Грамадзяне Беларусі знаходзяцца ў Польшчы шмат гадоў і пражываюць тут легальна. Мясцовая раённая пракуратура абвінаваціла іх ва ўдзеле ў незаконным увозе ў Польшчу 4600 пачкаў беларускіх цыгарэт без польскіх акцызных марак з выкарыстаньнем бесьпілётнага лятальнага апарату.
У красавіку 2026 году Памежная служба Польшчы знайшла гэтыя цыгарэты ў пачках у лясах Беластоцкага павету на падставе так званых пін-кодаў (запісаў аб месцазнаходжаньні), знойдзеных у тэлефоне аднаго з абвінавачаных. Сьледчыя таксама абвінавацілі іх у парушэньні Закону аб санкцыях, які зьяўляецца палажэньнем 2022 года аб спэцыяльных захадах па супрацьдзеяньні падтрымцы агрэсіі супраць Украіны і для абароны нацыянальнай бясьпекі.
Абвінавачаныя не прызналі сябе вінаватымі.
Што выявіла памежная служба?
Усе трое — калегі, яны добра ведаюць адзін аднаго. Грамадзяне Беларусі жылі ў адным будынку, і паляк часта іх наведваў. Усе яны знаходзяцца пад вартай. Ніхто з іх не прызнаўся ва ўдзеле ў кантрабандзе ў судзе. Яны сьцьвярджаюць, што былі затрыманыя памежнай службай, калі ехалі ў Горадню, каб знайсьці тэлефон і гаманец аднаго са сваіх сяброў.
Аднак, як адзначыў адзін з супрацоўнікаў памежнай службы, дапытаны ў якасьці сьведкі, усё адбылося раніцай, калі яшчэ было цёмна, а ў тэлефоне аднаго з трох арыштаваных тады мужчын былі скрыншоты месцаў, дзе іншыя патрулі знайшлі кантрабанду. У выніку мужчын арыштавалі і спачатку даставілі ў памежны пункт у Баброўніках.
21 жніўня суд выслухаў усіх сьведкаў, у тым ліку супрацоўнікаў памежнай службы і сяброў абвінавачаных. На просьбу адваката аднаго з абвінавачаных суд вырашыў адкласьці паседжаньне да пачатку верасьня. Калі бакі прадставяць свае заключныя аргумэнты, прысуд першай інстанцыі будзе вынесены не пазьней як праз два тыдні.
Гэта ня першы падобны суд у Польшчы
У чэрвені 2026 году гэты ж самы суд вынес прысуд у дачыненьні да трох палякаў, абвінавачаных ва ўдзеле ў падобнай кантрабанднай апэрацыі, але з выкарыстаньнем метэаралягічных балёнаў.
Абвінавачваньні ўключалі кантрабанду 11 500 пачкаў цыгарэт. Суд пакараў аднаго з пасдудных на 2,5 года пазбаўленьня волі, а двух іншых — да ўмоўных тэрмінаў.
Чаму гэта важна
Аб затрыманьні кантрабандных цыгарэт з Беларусі Польшча, Літва і Латвія паведамляюць рэгулярна.
Напрыклад, 23 сакавіка 2026 году паведамлялася, што з пачатку 2026 года Падляскі атрад памежнага ведамства выявіў кантрабанду, перапраўленую з Беларусі ў Польшчу з дапамогай мэтэазондаў, на агульную суму больш за 3,3 млн злотых (917 тыс. даляраў).
30 сакавіка гэтага году паведамлялася, што перавозку каля 1,8 млн кантрабандных цыгарэт спынілі супрацоўнікі Надбужанскага аддзела Памежнай аховы і Нацыянальнай падатковай адміністрацыі Польшчы. Кошт кантрабанды перавысіў 1,5 млн злотых (417 тыс. даляраў). Частка цыгарэт была беларускай вытворчасьці.
31 сакавіка паведамлялася аб затрыманьні 10 грамадзянаў Беларусі ў складзе «міжнароднай тытунёвай злачыннай групы». Група ў складзе 12 чалавек дзейнічала на тэрыторыі Паморскага і Мазавецкага ваяводзтваў. Апроч беларусаў, затрымана па адным грамадзяне Латвіі і Польшчы. Было канфіскавана амаль 17 тон тытунёвай сыравіны і рэзанага тытуню, больш за 4,1 млн цыгарэт. Кошт канфіскаваных падакцызных тавараў склаў больш за 9 млн злотых (2,5 млн даляраў).
У Літве кантрабанда цыгарэт паветранымі балёнамі выклікае збоі ў працы Віленскага аэрапорту, ад чаго церпяць авіякампаніі і пасажыры. Гэта выклікала палітычны крызіс у адносінах Менска і Вільні, паколькі літоўскі ўрад разглядае гэта як гібрыдную атаку і на некаторы час закрываў мяжу зь Беларусью.
Сілавым структурам Польшчы і Літвы ўдалося затрымаць некаторых падазраваных у арганізацыі такой кантрабанды, іх справы ўжо даходзяць да суду.