«Гэта ніякая не гендэрная роўнасьць, гэта пашырэньне абавязкаў жанчын перад краінай, бо гендэрная роўнасьць — гэта адначасова пашырэньне правоў, магчымасьцяў удзелу ў прыняцьці рашэньняў, а тут гэтага няма, тут менавіта пашырэньне толькі абавязкаў», — сказала Свабодзе Ірына Сідорская.
Ірына Сідорская
Экспэртка зьвярнула ўвагу, што рашэньне ўхвалена пасьля чатырох з паловай гадоў поўнамаштабнай агрэсіі супраць Украіны.
«Увесь апошні час дзяржава выкарыстоўвае вельмі такую традыцыяналісцкую гендэрную рыторыку, што жанчына павінна быць перш за ўсё маці, захавальніцай сям’і, традыцый і гэтак далей. Але мы бачым, што, калі дзяржаве патрабуюцца прафэсійныя кампэтэнцыі жанчын, чамусьці гэтая традыцыйная рыторыка вельмі лёгка зьнікае і гаворыцца [...] пра вайсковы ўлік. Я б дакладна не гаварыла, што беларуская дзяржава ідзе кудысьці ў бок гендэрнай роўнасьці», — адзначыла Ірына Сідорская.
Экспэртка таксама зьвярнула ўвагу на тое, што ў дакумэнце адсутнічае матывацыя ўведзеных зьменаў для жанчын з мэдычнай адукацыяй, якія павінны стаць на першапачатковы вайсковы ўлік.
ГЛЯДЗІЦЕ ТАКСАМА:
У Беларусі пабольшала спэцыяльнасьцяў, зь якімі жанчыны павінны стаць на першапачатковы вайсковы ўлікШто папярэднічала
Міністар абароны Беларусі Віктар Хрэнін 30 ліпеня падпісаў пастанову, якая зацьвердзіла пералік спэцыяльнасьцяў у войску, па якім атрымалі падрыхтоўку і мусяць стаць на першапачатковы вайсковы ўлік жанчыны ва ўзросьце з 19 гадоў. Яна пачынае дзейнічаць з 10 жніўня, у дзень яе афіцыйнай публікацыі.
Цяпер у пераліку — 15 спэцыяльнасьцяў, атрыманых у вышэйшых і сярэдне-спэцыяльных навучальных установах, а таксама пасьля курсаў перападрыхтоўкі. Раней такіх спэцыяльнасьцяў было 10.
Міністэрства абароны Беларусі пэрыядычна абнаўляе пералік спэцыяльнасьцяў для жанчын, якія павінны стаць на вайсковы ўлік.
Упершыню такі дакумэнт зьявіўся ў 2003 годзе, а пасьля ўказу ад 7 сьнежня 2006 году, якім Аляксандар Лукашэнка зацьвердзіў палажэньне аб Міністэрстве абароны, вайсковае ведамства пэрыядычна ўносіць зьмены ў парадак аб вайсковым уліку.
Апошні раз такія зьмены для жанчын адбыліся ў 2020 годзе. Тады ў пастанове адзначалася, што зьмены водзяць праз патрэбу Ўзброеных сіл і іншых ваенізаваных фарміраваньняў Беларусі ў такіх спэцыялістах.