«Андрэй быў вымушаны ўцячы зь Беларусі. Улады дзяржавы абвінавацілі яго ў „экстрэмізьме“. У ператрусах у ягонай кватэры і ў кінашколе ўдзельнічалі 8 супрацоўнікаў АМАПу і 2 супрацоўнікі КДБ. Ператрусы працягваліся 15 гадзін. У яго забралі пашпарт і тэлефон», — паведаміў на сваёй старонцы ў Facebook заснавальнік і дырэктар кінафэстывалю Bulbamovie Януш Гаўрылюк.
Асобна ён зьвярнуў увагу на тое, што ўсе мэсэнджары і профілі Андрэя Кудзіненкі цяпер пад кантролем КДБ. «Андрэю сказалі, што яму пагражае ад 8 да 12 гадоў пазбаўленьня волі. Гэта яшчэ адзін прыклад таго, як рэжым зьнішчае незалежную культуру і перасьледуе людзей мастацтва. Сёньня самае галоўнае — Андрэй у бясьпецы. Хочацца верыць, што ўжо хутка ён зноў зможа здымаць кіно, а не змагацца за ўласную свабоду», — адзначыў Януш Гаўрылюк.
Андрэй Кудзіненка — рэжысэр фільму «Акупацыя. Містэрыі», беларусьфільмаўскай «Масакры», сузаснавальнік фэстывалю Bulbamovie, аўтар дакумэнтальных фільмаў для тэлеканалу Белсат. Ягоныя стужкі дэманстраваліся на найбольшых міжнародных кінафэстывалях сьвету.
ГЛЯДЗІЦЕ ТАКСАМА:
Дакладчык ААН заявіў, што ў Беларусі больш палітычных зьняволеных на душу насельніцтва, чым у любой іншай краіне сьветуЧаму гэта важна
У Беларусі пасьля прэзыдэнцкіх выбараў 2020 году і масавых акцыяў пратэсту супраць фальсыфікацыі іх вынікаў пачаліся жорсткія рэпрэсіі. Пад палітычна матываваны перасьлед трапілі ўдзельнікі пратэстаў, цэлыя прафэсійныя групы і грамадзкія арганізацыі.
Згодна з дасьледаваньнем ініцыятывы BelPol, агульная колькасьць рэпрэсаваных у Беларусі з траўня 2020-га, калі пачалася прэзыдэнцкая выбарчая кампанія, па красавік 2026-га складае ня менш за 500 тысяч.
Паводле зьвестак праваабаронцаў, за кратамі ў Беларусі знаходзяцца сама меней 869 палітычных зьняволеных. Кожны месяц такі статус атрымліваюць па 30–50 новых вязьняў.
Незалежныя назіральнікі задакумэнтавалі больш за 6000 парушэньняў культурных і чалавечых правоў, якія закранулі дзеячаў культуры — пісьменьнікаў, музыкаў, выдаўцоў, актораў і мастакоў. Дзясяткі дзеячаў беларускай культуры былі асуджаныя за мінулыя пяць гадоў на турэмнае зьняволеньне або хатні арышт.