Памочніца генэральнага сакратара ААН Марта Побі заявіла, што павелічэньне колькасьці пасяджэньняў Рады бясьпекі праз вайну ва Ўкраіне адлюстроўвае небясьпечную эскаляцыю і павышэньне рызыкаў далейшага пагаршэньня з рэгіянальнымі і глябальнымі наступствамі.
«Ад вайны пакутуюць мірныя жыхары ва Ўкраіне і Расеі»
«За апошнія некалькі тыдняў інтэнсіўнасьць і маштаб нападаў Расейскай Фэдэрацыі супраць Украіны значна ўзрасьлі, што прывяло да большай колькасьці ахвяр сярод мірнага насельніцтва і разбурэньняў. Толькі сёньня (29 чэрвеня), як паведамляецца, па ўсёй Украіне праз расейскія паветраныя ўдары загінулі сама меней 15 чалавек. Таксама паведамлялася пра эскаляцыю нападаў у раёнах Украіны, якія знаходзяцца пад часовай акупацыяй Расейскай Фэдэрацыі», — сказала Марта Побі.
Памочніца Генэральнага сакратара ААН дадала, што ў акупаваным Расеяй Крыме і горадзе Севастопаль пасьля ўкраінскіх атак абвясьцілі надзвычайнае становішча праз нястачу паліва і вады, а ўдары па прамысловых, вайсковых і энэргетычных аб’ектах таксама працягваюць прыводзіць да ахвяр сярод мірнага насельніцтва ўнутры Расеі.
«Як мы паведамлялі, 17 чэрвеня ў Бранскай вобласьці Расейскай Фэдэрацыі бесьпілётнік пацэліў у аўтобус, які перавозіў моладзевую футбольную каманду Беларусі. Паводле зьвестак расейскіх і беларускіх уладаў, адна цяжарная жанчына загінула, а дзевяць чалавек, шэсьць зь якіх дзеці, атрымалі раненьні. ААН ня мае дадатковай інфармацыі аб гэтым інцыдэнце», — адзначыла Марта Побі.
Памочніца Генэральнага сакратара ААН заявіла аб неабходнасьці абароны мірнага насельніцтва і асудзіла напады на цывільных грамадзян і інфраструктуру, дзе б гэта не адбывалася.
Апроч таго, яна зьвярнула асобную ўвагу, што ў краінах, якія мяжуюць з Украінай і Расеяй, пачасьціліся выпадкі парушэньня паветранай прасторы бесьпілётнікамі — пра такія інцыдэнты паведамлялі ўлады Малдовы, Латвіі, Літвы, Эстоніі, Фінляндыі, Польшчы і Беларусі, а таксама краін шырэйшага рэгіёну — Баўгарыі, Грэцыі, Казахстану і Турэччыны.
ГЛЯДЗІЦЕ ТАКСАМА:
Зьнішчальнікі NATO упершыню зьбілі бесьпілётнік у паветранай прасторы Латвіі. Што вядомаАб магчымай эскаляцыі з боку Беларусі
Марта Побі асобна зьвярнула ўвагу на магчымую эскаляцыю вайны Расеі супраць Украіны ў сувязі з Беларусьсю.
«Мы занепакоеныя нядаўняй рыторыкай эскаляцыі і магчымасьцю далейшага распаўсюджваньня гэтай вайны. Неабходна зрабіць усё магчымае, каб гэтага не адбылося. Таму мы заклікаем Расейскую Фэдэрацыю, Украіну і ўсе зацікаўленыя дзяржавы-чальцы пазьбягаць любых крокаў, якія могуць прывесьці да далейшага распаўсюджваньня гэтай вайны — наўмысна ці ненаўмысна», — адзначыла яна.
Памочніца генэральнага сакратара ААН заклікала да дыялёгу і дыпляматыі, каб неадкладна зьнізіць напружанасьць і прадухіліць яшчэ «большы пажар».
«Мы заклікаем усе зацікаўленыя бакі ў рэгіёне зрабіць свой унёсак у мірныя намаганьні ва Ўкраіне і спрыяць доўгатэрміноваму міру і бясьпецы ў рэгіёне», — заявіла Марта Побі.
ГЛЯДЗІЦЕ ТАКСАМА:
Лукашэнка саступіў? Чаму спрацаваў ультыматум Зяленскага. Вынікі тыдня з Валерам КарбалевічамШто сказаў прадстаўнік Беларусі
Сталы прадстаўнік Беларусі ў ААН Валянцін Рыбакоў заявіў, што ў дзень інцыдэнту ў Бранскай вобласьці адзін з украінскіх бесьпілётнікаў знайшлі ў Лельчыцкім раёне Гомельскай вобласьці, які быў ідэнтычным таму, які атакаваў аўтобус у Расеі.
«Ужо цяпер можна з поўнай упэўненасьць канстатаваць, што ўдар па аўтобусе ня стаў вынікам выпадковых або нявыбарных дзеяньняў, якія прынесьлі спадарожную шкоду. Гэтая атака была кіраваная і кантраляваная», — заявіў Валянцін Рыбакоў.
Прадстаўнік Беларусі падкрэсьліў, што такія дзеяньні зьяўляюцца парушэньнем міжнароднага права і заклікаў асудзіць «гэты тэрарыстычны акт». Рыбакоў дадаў, што пракуратура Беларусі вядзе расьсьледаваньне інцыдэнту паводле факту тэракту і цяпер мае дакладную інфармацыю, што «ўдар быў нанесены бесьпілётным апаратам украінскай вытворчасьці».
Паводле Рыбакова, дрон, якім атакавалі аўтобус, належыць да клясы Darts — іх вырабляе каманда «Сталёвыя шэршні». Бесьпілётнік меў баявую частку з выбуховым рэчывам, эквівалентным прыблізна 1200 грамам тратылу, а на месцы былі знойдзеныя дэталі з маркіроўкамі на ўкраінскай мове.
Рыбакоў перакананы, што гэты інцыдэнт накіраваны на ўцягваньне Беларусі ў вайну і заявіў аб недапушчальнасьць любых пагроз і ўльтыматумаў на адрас беларускіх уладаў.
«Пры гэтым мы настойліва рэкамэндуем не выпрабоўваць далей цярпеньне беларускага боку і ні ў якім выпадку ня лічыць адсутнасьць тэрміновай жорсткай рэакцыі праявай слабасьці, нерашучасьць або баязьлівасьці», — сказаў ён і заклікаў да дыпляматыі і перамоў.
Паводле яго, паміж Беларусьсю і Ўкраінай працягваецца канфідэнцыйны дыялёг па абмене думкамі аб сытуацыі і дапамозе ў абменах палоннымі, а любыя рэзкія заявы ўкраінскага кіраўніцтва зьяўляюцца правакацыяй.
Рыбакоў таксама паведаміў, што ў дзень інцыдэнту ў Бранскай вобласьці, 17 чэрвеня, на тэрыторыі Беларусі ў Лельчыцкім раёне Гомельскай вобласьці знайшлі аналягічны дрон, якім атакавалі аўтобус у Бранскай вобласьці.
Паводле яго, дрон ляцеў з Украіны празь Беларусь у Расею, і гэта не адзінкавы выпадак.
«Калі б Беларусь зьвярталася з просьбамі аб скліканьні пасяджэньняў Рады бясьпекі па кожнымі інцыдэнце з БПЛА на сваёй тэрыторыі, такіх сустрэч магло б быць больш, чым рэгулярных штомесячных пасяджэньняў», — заявіў Рыбакоў.
ГЛЯДЗІЦЕ ТАКСАМА:
У Беларусі прайшоў новы абмен палоннымі паміж Расеяй і Ўкраінай. Беларусаў сярод іх не былоРэакцыя Ўкраіны
Сталы прадстаўнік Украіны ў ААН Андрэй Мельнік заклікаў раду ААН ухваліць рэзалюцыю для поўнага і безумоўнага спыненьня агню з боку Расеі.
«За апошнія 15 месяцаў Украіна неаднаразова заклікала Раду бясьпекі ўхваліць рэзалюцыю для поўнага і безумоўнага спыненьня агню. Ды, на жаль, працягнутая рука Ўкраіны такі і засталася вісець у паветры», — працытавала Мельніка агенцтва «Інтерфакс-Україна».
Украінскі дыплямат падкрэсьліў, што Кіеў гатовы да наўпроставых перамоў з Расеяй дзеля дасягненьня моцнага і справядлівага міру адпаведна Статуту ААН, аднак гэта не азначае бязьмежнага чаканьня.
«Наша цярпеньне не бязьмежнае. Рада бясьпекі павінна падумаць, як доўга можна выкарыстоўваць падыход „пачакаем і пабачым“ — калі гэта будзе працягвацца, ня выключана, што Ўкраіна мадыфікуе свае падыходы», — заявіў Мельнік.
Паводле яго, спыненьне агню па фактычнай лініі разьмежаваньня ўжо зьяўляецца кампрамісам з боку Ўкраіны.
Завяршаючы выступ, украінскі дыплямат зьвярнуўся непасрэдна да прадстаўніка Расеі:
«Вам ніколі ня ўдасца ўтрымаць акупаваныя землі. Ніколі. Прыбірайцеся з Украіны як мага хутчэй».
ГЛЯДЗІЦЕ ТАКСАМА:
У выніку расейскай ракетнай атакі Дніпра ёсьць ахвяры і параненыяШто папярэднічала
17 чэрвеня кіраўнік Бранскай вобласьці Расеі Ягор Кавальчук заявіў, што ў выніку «абстрэлу з боку ўкраінскіх сілаў» пацярпеў аўтобус, у якім дзіцячая футбольная каманда з Гомля ехала на адпачынак у расейскі Геленджык. Адзін чалавек загінуў і яшчэ 8 атрымалі раненьні, у тым ліку шасьцёра дзяцей — двое зь іх былі ў цяжкім стане.
Здарэньне адбылося каля 11-й гадзіны ў раёне вёскі Рудня Бранскай вобласьці. На фота, распаўсюджаным бранскімі абласнымі ўладамі і дзяржаўнымі СМІ Беларусі, быў аўтобус з выбітымі шыбамі і пашкоджаньнямі, імаверна ад аскепкаў снараду.
Сьледчыя камітэты Расеі і Беларусі завялі крымінальную справу. У Расеі — паводле факту тэрарыстычнага акту.
У МЗС Беларусі асудзілі атаку, але зьвярнулі ўвагу на «неабходнасьць выкананьня парадку арганізацыі выезду групаў грамадзян, асабліва дзяцей, на аздараўленьне і адпачынак у замежныя дзяржавы» і «абавязковасьць безумоўнага выключэньня выезду грамадзян у зоны канфліктаў, баявых дзеяньняў і сумежных зь імі рэгіёнаў».
Ва Ўкраіне зьняпраўдзілі сваю датычнасьць да гэтага інцыдэнту.