Прэзыдэнт Расеі Ўладзімір Пуцін падпісаў закон, які дазваляе арыштоўваць маёмасьць расейцаў, што зьехалі з краіны, нават па адміністрацыйных справах.
Сярод такіх правінаў —
- парушэньне парадку дзейнасьці так званага «замежнага агента»,
- «злоўжываньне» свабодай масавай інфармацыі,
- заклікі да «тэрарыстычнай» або «экстрэмісцкай» дзейнасьці,
- заклікі да парушэньня тэрытарыяльнай цэласнасьці Расеі і да ўвядзеньня санкцыяў,
- дыскрэдытацыя расейскага войска.
Закон дазваляе арыштоўваць маёмасьць і банкаўскія рахункі расейцаў, што жывуць за мяжой, у якасьці «меры забесьпячэньня» — да выплаты прызначанага адміністрацыйнага штрафу.
Прычым кошт арыштаванай маёмасьці можа значна перавышаць суму штрафу.
Закон набудзе моц 1 верасьня.
А што ў Беларусі
У Беларусі з 2022 году практыкуюцца завочныя суды над людзьмі, якіх рэжым у Беларусі лічыць сваімі праціўнікамі. І ў якасьці пакараньня прымяняецца так званая «спэцыяльная канфіскацыя» маёмасьці.
З 2023 году таксама дзейнічае асобны закон пра «адбіраньне маёмасьці» за недружалюбныя дзеяньні ў іншаземных кампаній і грамадзян.
Аналяга расейскаму закону пра арышт маёмасьці паводле адміністрацыйных спраў у Беларусі пакуль няма.