22 траўня 1900 году на Ігуменшчыне нарадзіўся Мікола Касьпяровіч, беларускі этнограф, краязнаўца, мовазнаўца і дасьледнік літаратуры.
Касьпяровіч арганізаваў Ігуменскія павятовыя беларускі нацыянальны камітэт і школьную раду, удзельнічаў у антыпольскім падпольлі.
Мікола Касьпяровіч
Пісаў пра гісторыю краязнаўчай працы на Беларусі, яе задачы і мэтодыку, дасьледаваў гісторыю беларускага выяўленчага мастацтва, архітэктуру, сучасную графіку. Уклаў дыялектны «Віцебскі краёвы слоўнік», узорны для свайго часу.
Ахвяра сталінізму. Арыштаваны ў 1930 годзе ў межах сфабрыкаванай савецкімі карнымі органамі справы няіснага «Саюзу вызваленьня Беларусі».
Правёў 5 гадоў у лягерах Кемераўскай вобласьці.
Выйшаў на волю і настаўнічаў, але праз два гады яго арыштавалі паўторна і расстралялі. Рэабілітаваны пасьмяротна ў абодвух прысудах.
Дзень у гісторыі
1501 — у Вільні асьвяцілі касьцёл Сьвятой Ганны.
Помнік готыкі ўсясьветнага маштабу, мураваны касьцёл Сьвятой Ганны ў Вільні пабудавалі ў 1495–1500 гадах і асьвяцілі 22 траўня 1501 году. Мэцэнатам касьцёла быў вялікі князь літоўскі Аляксандар (1461–1506). У 1501–1507 гадах архітэктар Мікалай Энзынгер з Гдані аднавіў ансамбль касьцёла.
1848 — пачаў дзейнічаць Дняпроўска-Бужанскі канал.
1863 — Кадыскі бой паўстанцаў з расейскім войскам.
1925 — у Вільні выйшаў апошні нумар газэты «Беларуская доля». Закрытая польскімі ўладамі.
1945 — польскія падпольнікі, падначаленыя Зыгмунта Шэндзеляжа «Лупашкі», спалілі на Беласточчыне беларускую вёску Патокі.
1962 — у паселішчы Сосны пад Менскам запусьцілі першы ў Беларусі атамны рэактар.
1972 — адбыўся першы ў гісторыі візыт прэзыдэнта ЗША ў Савецкі Саюз. З тыднёвым візытам СССР наведаў Рычард Ніксан.
1982 — адбылася прэм’ера «Тутэйшых» у Магілёўскім абласным драматычным тэатры. Рэжысэр — Валеры Масьлюк.
У гэты дзень нарадзіліся
1813 — Рыхард Вагнэр, нямецкі кампазытар, дырыгент, драматург, філёзаф.
1859 — Артур Конан Дойл, брытанскі пісьменьнік. Найбольшую вядомасьць здабыў дзякуючы сваім дэтэктыўным гісторыям пра Шэрлака Холмса і доктара Ўотсана.
Артур Конан Дойл
1899 — Мікола Чарнецкі, беларускі публіцыст, пэдагог, палітычны дзяяч.
1907 — Алена Аладава, беларуская мастацтвазнаўца.
1924 — Шарль Азнавур, францускі актор і сьпявак армянскага паходжаньня.
1931 — Мая Яніцкая, беларуская мастацтвазнаўца, дасьледніца дэкаратыўна-прыкладнога мастацтва.
Мая Яніцкая
1932 — Элеанора Вецер, мастацтвазнаўца, стваральніца Музэю старажытнай беларускай культуры ў Акадэміі навук Беларусі.
1932 — Мікола Тарасюк, разьбяр у дрэве, народны майстар Беларусі.
1944 — Юры Гарулёў, кінарэжысэр дакумэнтальных фільмаў.
1959 — Мікола Яцкоў, беларускі паэт, кампазытар-песеньнік.
Мікола Яцкоў, 2013 год
У памяці
1671 — памёр Аляксандар Казімер Сапега, віленскі біскуп.
1885 — памёр Віктор Гюго, францускі пісьменьнік, тэарэтык францускага рамантызму.
Віктар Гюго
2007 — памерла Ванда Махнач, беларускі мэдык, дзяячка Саюзу беларускай моладзі і беларускай дыяспары ў ЗША.
2011 — памёр Шалом Халяўскі, гісторык, у часе 2-й Усясьветнай вайны кіраўнік паўстаньня ў Нясьвіскім гета.
2017 — памёр Віктар Купрэйчык, беларускі шахматыст.