У Віленскім аэрапорце паведамілі, што ў ноч на 13 траўня на гадзіну спынялі працу праз «гібрыдную атаку Беларусі супраць Літвы, цывільнай авіяцыі і насельніцтва».
Як адзначаецца ў паведамленьні, працу аэрапорту спынялі, бо ў зонах рызыкі для авіяцыі зафіксавалі навігацыйныя сыгналы, характэрныя для балёнаў.
Ад абмежаваньня паветранай прасторы пацярпелі два рэйсы і 128 пасажыраў, якія былі ў самалётах. Адзін рэйс мусілі перанакіраваць у аэрапорт Капэнгагену (Данія), а другі рэйс— скасаваць. У аэрапорце папярэдзілі, што 13 траўня магчымыя затрымкі асобных рэйсаў, бо экіпажы не змаглі правесьці ратацыю.
ГЛЯДЗІЦЕ ТАКСАМА:
Літва выказала рашучы пратэст Беларусі праз парушэньні паветранай прасторы і рост плыні мігрантаўЧаму гэта важна
Балёны, пераважна ў Віленскім аэрапорце, але таксама і ў Ковенскім, летась парушылі графік больш за 370 рэйсаў, што закранула 53 000 пасажыраў і прывяло да закрыцьця лётнішчаў амаль на 60 гадзін. Агульныя страты ў выніку гэтых інцыдэнтаў перавысілі 2,3 мільёна эўра.
Летась у сярэдзіне сьнежня ўрад Літвы абвясьціў надзвычайнае становішча з гэтай прычыны. Была часова закрытая ў кастрычніку мяжа зь Беларусьсю. Тады Аляксандар Лукашэнка заявіў, што перапраўкай цыгарэт на паветраных балёнах займаюцца літоўскія грамадзяне. Ён дадаў, што ня бачыць парушэньня ў дзеяньнях беларускіх «бандзюгаў», бо яны ня скралі цыгарэты, а купілі іх на фабрыцы, каб прадаць з выгадай.
Сёлета ў лютым Літва падала Міжнароднай арганізацыі цывільнай авіяцыі (ICAO) доказы інцыдэнтаў, выкліканых кантрабандысцкімі балёнамі, якія запускаюць зь Беларусі.
Апошнія інцыдэнты з паветранымі балёнамі фіксавалі сёлета ў красавіку.
ГЛЯДЗІЦЕ ТАКСАМА:
Прэзыдэнт Літвы зноў выказаўся пра ўмовы палітычнага дыялёгу зь БеларусьсюЗакрыцьцё пераходаў на мяжы Літвы і Беларусі
- 8 жніўня 2023 году Літва закрыла пункты пропуску Шумск (з боку Беларусі Лоша) і Цьверач (Відзы), 1 сакавіка 2024-га — Лаварышкі (Катлоўка) і Райгорад (Прывалка). На мяжы зь Беларусьсю працягвалі працаваць два памежныя пераходы — Меднікі (Каменны Лог) і Салечнікі (Беняконі).
- Урад Літвы 27 кастрычніка 2025 году зусім закрыў мяжу зь Беларусьсю на месяц пасьля таго, як некалькі разоў вымушана прыпынялася праца аэрапортаў у Вільні і Коўне з прычыны зьяўленьня паблізу іх аэрастатаў, якія ляцелі зь Беларусі, несучы цыгарэты.
- Улады Беларусі ў адказ 31 кастрычніка забаранілі літоўскім грузавікам выяжджаць цераз польскую і латвійскую мяжу.
- 10 лістапада на загад Аляксандра Лукашэнкі ўсе літоўскія фуры, якія знаходзяцца ў Беларусі, сабралі на адмысловых пляцоўках і ўзялі пад ахову з выстаўленьнем рахункаў — 120 эўра на содні. Паводле Лукашэнкі, фураў было больш за 1100.
- 10 лістапада Вільня зьвярнулася да Менску з просьбай дазволіць выезд грузавікоў сваіх кампаніяў у Літву. Менск адмовіў.
- Вільня марна спрабавала вярнуць транспарт шляхам кантактаў на ведамасным узроўні. Беларусь прапанавала Літве або скасаваць рашэньне аб закрыцьці мяжы, або выйсьці на палітычна-дыпляматычнае разьвязаньне праблемы.
- 19 лістапада ўрад Літвы вырашыў, што закрытыя ў кастрычніку два пункты пропуску на мяжы Літвы і Беларусі Меднікі і Салечнікі адкрыюцца з 20 лістапада. Перад гэтым прэмʼер-міністарка Інга Ругінене заявіла, што апошнім часам паветраных балёнаў з кантрабандавымі цыгарэтамі стала меней.
- Аднак пасьля таго як урад Літвы зноў адкрыў мяжу, Віленскі аэрапорт зноў некалькі разоў закрывалі з прычыны аэрастатаў зь Беларусі, а літоўскім фурам па-ранейшаму не даюць выехаць у Літву. Беларускі бок патрабуе ад Вільні пачатку палітычных перамоваў.