З таго часу, як судна адплыло з Аргентыны ў мінулым месяцы, памерлі тры чалавекі — галяндзкая пара і грамадзянка Нямеччыны. Першым падазраваным выпадкам быў 70-гадовы галяндзец, які раптоўна захварэў на судне з ліхаманкай, галаўным болем, болем у жываце і дыярэяй, паведаміла CNN Міністэрства аховы здароўя Паўднёвай Афрыкі. Ён памёр на борце 11 красавіка.
Што важна ведаць пра хантавірус
У чацьвер САЗ заявіла, што, хоць і чакае новых выпадкаў захворваньня, яна не прадбачыць маштабнай эпідэміі, падобнай да Covid, і падкрэсьліла, што няма доказаў рызыкі шырокамаштабнай перадачы вірусу.
Цяперашняя ўспышка была зьвязана са штамам хантавірусу, які паходзіць з горнага рэгіёну Андаў у Паўднёвай Амэрыцы. Гэта рэдкі, але патэнцыйна вельмі небясьпечны вірус, які ў некаторых выпадках можа распаўсюджвацца паміж людзьмі пры цесным кантакце.
Аргентыскі дасьледчык трымае кантэйнэр, які выкарыстоўваецца для вывучэньня хантавірусу, 6 траўня 2026 году
Пакуль незразумела, як адбылася ўспышка. Але САЗ сыходзіць з таго, што галяндзкая пара, якая памерла, заразілася па-за караблём, магчыма, падчас агляду славутасьцяў Аргентыны перад тым, як далучыцца да круізу.
Гэтая пара «падарожнічала праз Аргентыну, Чылі і Ўругвай падчас паездкі па назіраньні за птушкамі, якая ўключала наведваньне месцаў, дзе прысутнічалі віды пацукоў, вядомыя як носьбіты вірусу», — сказаў кіраўнік САЗ Тэдрас Гебрэесус журналістам у чацьвер.
Інкубацыйны пэрыяд хантавірусу звычайна ад аднаго да шасці тыдняў, перш чым у пацыентаў праяўляюцца сымптомы. У паведамленні ў сацыяльных сетках САЗ заявіла, што «супрацоўнічае з адпаведнымі краінамі для падтрымкі міжнароднага адсочвання кантактаў, каб забяспечыць маніторынг патэнцыйна ўзніклых кантактаў і абмежаваньне далейшага распаўсюджваньня хваробы».
Што далей будзе з пасажырамі карабля?
Па стане на чацьвер на борце судна знаходзяцца 146 чалавек з 23 краін, якія знаходзяцца пад «строгімі мерамі засьцярогі», паведаміў апэратар Oceanwide Expeditions.
У канцы красавіка на аддаленым паўднёваатлянтычным востраве Сьвятой Алены высадзіліся як мінімум 30 пасажыраў з гэтага карабля, а на гэтым тыдні некалькі чалавек у крытычным стане былі эвакуаваныя ў Эўропу. Астатнія пасажыры павінны прыбыць на Канарскія выспы Гішпаніі ў гэтыя выхадныя, перш чым іх вернуць у свае краіны.
У апошняй інфармацыі гішпанскіх уладаў гаворыцца, што карабель прыбудзе на Тэнэрыфэ ў нядзелю каля поўдня па мясцовым часе (каля 14-й гадзіны па менскім часе).
Вось сьпіс краінаў, дзе пасажыры круізнага лайнэра, якія раней пакінулі карабель, альбо праходзяць лячэньне ад хантавірусу, альбо знаходзяцца пад наглядам на прадмет магчымага заражэньня:
- Нідэрлянды
- Паўднёвая Афрыка
- Швайцарыя
- Вялікая Брытанія
- ЗША
- Сынгапур