Як апавёў «Люстэрку» адзін з пасажыраў, аўтобус выехаў зь Менску а 4-й раніцы і на мяжы ў Медніках яго не прапусьцілі літоўскія мытнікі:
«Нам сказалі, што не паедзем далей праз паліва, больш нічога не тлумачылі. Давялося выклікаць таксі да Вільні з найбліжэйшай запраўкі з боку Літвы. Ці прапусьцілі аўтобус пасьля, ня ведаю: трэба было сьпяшацца на самалёт».
Паводле мужчыны, перавозьнік не прапанаваў яму кампэнсацыі за нязручнасьці.
Журналіст «Люстэрка» пад выглядам працадаўцы аднаго з пасажыраў зьвязаўся з кампаніяй «Інтэркарс», празь якую пасажыр купляў білет. Там пацьвердзілі, што аўтобус не прапусьцілі. А наконт кампэнсацыі параілі зьвярнуцца наўпрост да перавозьніка — кампаніі «ІП Баертранс». Аднак там на званкі ніхто не адказаў.
3 траўня ў Літве дзейнічаюць новыя абмежаваньні супраць Беларусі і Расеі ў сувязі з ваеннай агрэсіяй супраць Украіны. Адно зь іх — пры ўезьдзе ў Літву ў баках можа быць ня больш за 200 літраў паліва.