У Міністэрстве ў надзвычайных сытуацыях Беларусі папярэдзілі, што 27 красавіка на большай частцы тэрыторыі краіны чакаюць узмацненьня паўночна-заходняга і заходняга ветру парывамі 15-20 мэтраў за сэкунду, а ўдзень месцамі да 24 мэтраў за сэкунду, у многіх раёнах пройдуць дажджы і мокры сьнег.
Сярод фактараў небясьпекі ў ведамстве назвалі пашкоджаньне ліній сувязі і электраперадач, адключэньне электрычных падстанцый і электраэнэргіі, пашкоджаньне або падзеньне слаба замацаваных канструкцый, дахаў будынкаў і збудаваньняў, падзеньне дрэў.
У выходныя праз моцны вецер зафіксавалі падзеньне дрэваў у Берасьцейскай, Віцебскай, Горадзенскай, Менскай вобласьцях і ў Менску.
Празь непагадзь пашкоджаньні атрымалі 8 легкавых аўтамабіляў — у Менску (3), у Берасьцейскай вобласьці (1) і ў Горадзенскай вобласьці (4).
У Берасьцейскай вобласьці і ў Менску ратаўнікі дапамагалі здымаць пашкоджаныя элемэнты канструкцый будынкаў і збудаваньняў. Паводле апэратыўнай інфармацыі, ніхто не пацярпеў.