У траўні мелі пачацца чартэрныя рэйсы зь Менску ў віетнамскі Дананг. Пра іх скасаваньне паведаміў «АэраБелСэрвіс», піша Рэспубліканскі саюз турыстычных арганізацый.
Усе рэйсы скасаваныя «ў сувязі з арганізацыйнымі прычынамі». Як паведаміла турфірма у рассылцы турыстычным агентам, усе заяўкі, забраняваныя на Дананг, будуць ануляваныя «без штрафных санкцый».
«АэраБелСэрвіс» прапанаваў перакіраваць турыстаў на іншыя напрамкі з простым пералётам зь Менску. Гэта можа быць Нячанг ў Віетнаме, кітайскі Хайнань або Пхукет ці Патая ў Тайляндзе.
Акрамя таго, магчымая замена непасрэднага пералёту ў Дананг на палётную праграму Менск — Нячанг з далучаным унутраным пералётам да Данангу.
Палётная праграма для турыстаў Менск — Дананг — Менск мелася стартаваць з 10 траўня. Гаворка ішла пра туры на 10-11 начэй. Праграма магла стаць для «Белавія» ўжо трэцяй, што яна выконвае ў Віетнам. Цяпер беларусам даступны простыя пералёты на Фукуок і ў Нячанг. Праўда, на Фукуок яна скончыцца да 30 красавіка, затое праграма ў Нячанг толькі стартавала 20 красавіка.
Беларусы могуць ляцець у Віетнам бязь візы, калі тэрмін знаходжаньня ў краіне не перавышае 30 дзён з даты ўезду.