Дата дня
З 22 красавіка на 23 красавіка 1794 году падчас паўстаньня Тадэвуша Касьцюшкі была вызваленая Вільня. Паўстаньне ставіла мэтай скасаваньне першага і другога падзелаў Рэчы Паспалітай, якія адбыліся ў 1772 і 1793 гадах.
ГЛЯДЗІЦЕ ТАКСАМА:
10 прычын, чаму слава Касьцюшкі належыць БеларусіТаксама ў гэты дзень
1500 — на шляху да Індыі партугалец Пэдру Кабрал адкрыў Бразылію, прыняўшы яе за востраў.
1725 — нясьвіскі ардынат, вялікі гетман Міхал Казімер Радзівіл, празваны Рыбанькам, ажаніўся з Уршуляй Францішкай Вішнявецкай. Хранікёры пішуць, што гэта быў шчасьлівы зьвяз.
Уршуля Радзівіл. Выстава «Славутыя асобы Беларусі». Аўтары Ляілея і Валянцін Варэца.
1838 — украінскі паэт Тарас Шаўчэнка піша паэму «Кацярына». На беларускую мову яе перакладзе Янка Купала:
Кахайцеся, чарнабрыўкі,
Ды не з маскалямі,
Маскалі — чужыя людзі,
Чыняць ліха з вамі,
— так пачынаецца гэтая паэма.
Тарас Шаўчэнка, 1840 год
1915 — падчас Першай сусьветнай вайны Нямеччына ўжыла хлёр як хімічную зброю супраць англа-францускіх войскаў паблізу гораду Іпр ў Бэльгіі.
Жаўнеры палявой артылерыйскай брыгады 4-й аўстралійскай дывізіі на гаці ў лесе Шато на Іпрскім выступе, 29 кастрычніка 1917 году. Фота Фрэнка Гэрлі
1919 — пасьля заняцьця польскім войскам Вільні Начальнік Польскай дзяржавы Юзэф Пілсудзкі выдаў адозву да жыхароў былога Вялікага Княства Літоўскага, дэкляруючы ім самавызначэньне.
«Польскае войска, каторае я з сабою прывёў, каб выкінуць гаспадараваньне гвалту і сілы, каб спыніць кіраваньне краем проціў волі жыхароў, гэтае войска нясе ўсім Вам свабоду. Хачу Вам даць магчымасьць разьвязаць унутраныя нацыянальныя і рэлігійныя справы гэтак, як самі захочаце, безь якога-небудзь гвалту або націску з боку Польшчы».
У гэты дзень нарадзіліся
1724 — Імануіл Кант, нямецкі філёзаф.
Імануіл Кант
1870 — Уладзімір Ульянаў (Ленін), расейскі камуністычны тэарэтык, арганізатар і кіраўнік Кастрычніцкай рэвалюцыі ў Расеі, першы кіраўнік Савецкай дзяржавы.
Помнік Леніну на плошчы Незалежнасьці ў Менску
1979 — Кацярына Сумарава, мастачка.
1899 — Уладзімір Набокаў, расейскі і амэрыканскі пісьменьнік.
Уладзімір Набокаў
У памяці
1937 — у цягніку Уладзівасток—Масква застрэліўся Язэп Адамовіч, беларускі савецкі кіраўнік, які праводзіў палітыку беларусізацыі і ўзбуйненьня Беларусі.
Язэп Адамовіч, старшыня СНК БССР у 1920-х гадах
1954 — Сяргей Сахараў, фальклярыст, этнограф, царкоўны гісторык. Вязень ГУЛАГу.
2009 — Барыс Пянчук, вайсковы дырыжор.
2023 — горадзенскі архіяпіскап Арцемі. Адзіны высокапастаўлены ярарх праваслаўнай царквы, які асудзіў гвалт рэжыму ў 2020 годзе.