Аляксандар Лукашэнка заявіў, што заходнія палітыкі пасьля прыходу да ўлады намагаюцца атрымаць максымальную асабістую выгаду, а не працаваць на карысьць народу.
«Яны дачасьнікі. Прыйшлі, схапілі і сышлі — вось аснова іхнай палітыкі. Яны ня думаюць пра народ Францыі, Нямеччыны і гэтак далей. І ў гэтым іх праблема. Яны нас некалі вучылі: Расею, нас, Казахстан, Украіну, іншыя краіны. А цяпер яны да нас павінны прыяжджаць і рабіць адпаведныя высновы. Вучыцца і рабіць высновы яны ня хочуць», — працытавала Лукашэнку дзяржаўнае агенцтва БелТА.
Аналягічна ён выказаўся і пра прэзыдэнта ЗША Дональда Трампа.
«Ён дачасьнік, у яго чатыры гады. Што ён за чатыры гады зробіць? Нічога. Нічога ня зробіць. Таму ў прэзыдэнта павінен быць час», — дадаў Лукашэнка.
Лукашэнка знаходзіцца ва ўладзе ўжо 32 год. Яго выбралі на адзіных дэмакратычных выбарах прэзыдэнта, якія адбыліся ў 1994 годзе. Сёлета ў жніўні яму споўніцца 72 гады.
Ужо праз два гады свайго прэзыдэнцтва, у 1996 годзе, Лукашэнка разагнаў дэмакратычна абраны Вярхоўны Савет і стварыў ляяльны сабе парлямэнт, павялічыў свой першы прэзыдэнцкі тэрмін, а затым правёў канстытуцыйную рэформу, якая дазволіла яму балятавацца на пасаду прэзыдэнта неабмежаваную колькасьць разоў.
Зь сярэдзіны 1990-х гадоў аніводныя выбары і рэфэрэндумы ў Беларусі не былі прызнаныя міжнароднай супольнасьцю праз сотні фальсыфікацый, запалохваньне выбарнікаў і перасьлед апанэнтаў.