КДБ і расейская разьведка нешта рыхтуюць? Каму трэба КР і парэшткі Вітаўта

• Навошта Іван Тэртэль і Сяргей Нарышкін сустракаліся ў Калінінградзе? Там прайшла сустрэча кіраўніцтва КДБ Беларусі і СВР Расеі.
• 11–17 траўня адбудуцца выбары ў Каардынацыйную Раду чацьвёртага скліканьня. Навошта яна патрэбная і каму?
• Літоўскі дасьледчык назваў месца, дзе, імаверна, знаходзяцца парэшткі князя Вітаўта. Ці можна параўнаць гэта з выяўленьнем парэшткаў Каліноўскага і хто Вітаўт у беларускай гісторыі?

00:00 Каардынацыя спэцслужбаў Расеі і Беларусі супраць Захаду – рэальныя пагрозы ці інфармацыйная стратэгія
08:43 Чаму заявы пра «пагрозы з боку Захаду» гучаць у той час, калі Беларусь нармалізуе адносіны з ЗША
14:37 Навошта Лукашэнку патрэбна «ваенная гістэрыя»
16:40 Ці ёсць падставы для трывогі ў грамадства
21:30 Выбары ў Каардынацыйную раду — рэальны палітычны інструмэнт ці сымбалічны акт
32:32 Магчыма, знойдзеныя парэшткі князя Вітаўта. Чаму гэтая постаць дагэтуль выклікае дыскусіі

Цыганкоў пра сустрэчу Тэртэля і Нарышкіна

«Грунтуючыся на фактах, мы ня бачым ніякіх рэальных прычынаў падрыхтоўкі Беларусі ці Расеі да вайны супраць суседзяў. Мы б гэта ўбачылі, калі б было перасоўваньне войскаў, павелічэньне канцэнтрацыі дронаў і г.д. Але такія заявы людзей вельмі хвалююць. Я думаю, што гэта ўсё рытарычныя заявы. Аляксандар Лукашэнка нават не павялічыў ваенны бюджэт на 2026 год. Ён на некалькі сотняў мільёнаў меншы. Гэта рыторыка найперш для Пуціна, каб паказаць, што Беларусь нібыта рыхтуецца, робіць, што можа, падымае войскі і гатовая на любыя подзьвігі».

Цыганкоў пра выбары ў Каардынацыйную Раду

«Адбываецца дэпалітазацыя нават тых беларусаў, якія жывуць па-за межамі Беларусі і якія вымушаныя былі зьехаць. Людзі прымаюць меншы ўдзел у акцыя, розных імпрэзах. Зьніжаецца колькасьць людзей, якія выходзілі 25 сакавіка. Я прагназаваў гэта і ў 2025 годзе, што і крытыка Ціханоўскай будзе з часам павялічвацца. Але КР нам патрэбная. Ня толькі як протапарлямэнт, як правобраз Вярхоўнага савету. КР удзельнічае ў розных міжнародных структурах, прадстаўляе дэмакратычную Беларусь. І тое, што рэжым пагражае гэтым людзям, таксама сьведчыць пра іх уплыў. Здавалася б, калі яны ніхто, дык не зьвяртайце ўвагу».