Міністэрства абароны Румыніі заявіла, што радары зафіксавалі парушэньне паветранай прасторы расейскім бесьпілётнікам, пасьля чаго страцілі радарны кантакт зь ім за 16 км на паўднёвы ўсход ад памежнай вёскі Кілія-Вэке.
Нацыянальны вайсковы камандны цэнтар паведаміў пра інцыдэнт Генэральнай інспэкцыі ў надзвычайных сытуацыях. Улады папярэдзілі насельніцтва на поўначы акругі Тульча пра небясьпеку. Гэта адбылося а 00:43 мясцовага часу.
Паветраную трывогу скасавалі толькі ў 02:48.
Група Міністэрства нацыянальнай абароны раніцай выехала на выведку ў раён, дзе мог упасьці бесьпілётнік.
«Мы рашуча асуджаем дзеяньні Расейскай Фэдэрацыі, якія пагражаюць рэгіянальнай бясьпецы і ёсьць сур’ёзным парушэньнем нормаў міжнароднага права», — заявілі ў Міністэрстве абароны Румыніі.
Румынія, краіна ЕС і NATO, мае агульную сухаземную мяжу з Украінай працягласьцю 650 км, і з таго часу, як Расея пачала атакаваць украінскія парты на Дунаі, бесьпілётнікі ня раз парушалі паветраную прастору Румыніі, а іх фрагмэнты падалі на яе тэрыторыі.