У рэзалюцыі Рада бясьпекі заклікала Іран тэрмінова спыніць атакі на Бахрэйн, Кувэйт, Аман, Катар, Саудаўскую Арабію, Аб’яднаныя Арабскія Эміраты і Ярданію. У дакумэнце адзначаецца, што гэтыя ўдары парушаюць міжнароднае права і становяць «сур’ёзную пагрозу міжнароднаму міру і бясьпецы».
У рэзалюцыі таксама крытыкуюць выкарыстаньне Іранам у Ліване такіх проксі-груповак, як «Хэзбала» (прызнаная тэрарыстычнай у ЗША і Эўразьвязе).
Рэзалюцыю падтрымалі 13 з 15 чальцоў Рады бясьпекі. Яе ініцыяваў Бахрэйн, на гэты момант непастаянны сябра Рады бясьпекі ААН.
Іран асудзіў рэзалюцыю і назваў яе «злоўжываньнем» Радаю бясьпекі.
28 лютага ЗША разам з Ізраілем пачалі вайсковую апэрацыю супраць Ірану. У выніку ўдараў загінуў найвышэйшы кіраўнік Ірану Алі Хамэнэі, пашкоджаныя вайсковыя і ядзерныя аб’екты краіны. Іран у адказ наносіць удары па амэрыканскіх базах і інфраструктуры хаўрусьнікаў ЗША ў краінах Пэрсыдзкай затокі.
ГЛЯДЗІЦЕ ТАКСАМА: Reuters: найвышэйшы кіраўнік Ірану атрымаў раненьні, але працягвае працавацьВайсковая апэрацыя ЗША і Ізраілю супраць Ірану
28 лютага Дональд Трамп аб’явіў аб пачатку супольнай з Ізраілем маштабнай ваеннай апэрацыі супраць рэжыму ў Іране. Патрэбу ў апэрацыі зьвязалі з правалам перамоваў аб іранскай ядзернай праграме.
Аятала Алі Хамэнэі й іншыя прадстаўнікі найвышэйшага іранскага кіраўніцтва былі забітыя. Прэзыдэнт Ірану Масуд Пэзэшкіян назваў забойства Хамэнэі страшным злачынствам і паабяцаў адпомсьціць. Іран пачаў апэрацыю ў адказ і нанёс удары па амэрыканскіх аб’ектах на Блізкім Усходзе.
Масква наўпрост асудзіла агрэсію Ізраілю і ЗША супраць Ірану. Улады Беларусі адрэагавалі стрымана. Лукашэнка ў першыя два дні пасьля гібелі Хамэнэі не сказаў ані слова, а МЗС Беларусі 28 лютага двойчы выступіў з заявамі. У адной прагучала заклапочанасьць абвастрэньнем канфлікту вакол Ірану. У другой заяве атака на Іран асуджаецца, але Ізраіль і ЗША не названыя, акцэнт робіцца на гуманітарным аспэкце.
Беларуская дзяржаўная авіякампанія «Белавія» празь небясьпеку ўзаемных абстрэлаў на Блізкім Усходзе скасавала шэраг рэйсаў і 2 сакавіка накіравала эвакуацыйны самалёт зь Менску ў Доху, каб забраць беларускіх турыстаў, што апынуліся ў Катары, які таксама абстрэльваў Іран.
Паводле іранскага таварыства Чырвонага Паўмесяца, у Іране загінулі больш за 200 чалавек, параненыя больш за 700. Паводле іранскага інфармацыйнага агенцтва IRNA, 118 чалавек сярод загінулых — школьнікі.
Афіцыйныя асобы Аб’яднаных Арабскіх Эміратаў заявілі пра трох загінулых і 58 параненых у краіне з пачатку іранскіх атак на рэгіён Пэрсыдзкай затокі, якія сталі адказам на ваенныя апэрацыі ЗША і Ізраілю.
У выніку іранскага ракетнага ўдару па горадзе Бэйт-Шэмэш у Ізраілі, што за 40 км ад Ерусаліму, як мінімум 9 чалавек загінулі і 28 атрымалі раненьні. З пачатку новага абвастрэньня па тэрыторыі Ізраілю рэгулярна б’юць ракетамі.
2 сакавіка да баявых дзеяньняў у рэгіёне далучылася праіранская ісламісцкая групоўка «Хэзбала», якая пачала з тэрыторыі Лібану абстрэльваць Ізраіль.
У наступныя дні іранскія войскі працягвалі наносіць удары па Саудаўскай Арабіі, Бахрэйне, ААЭ, Кувэйце за іх супрацу з амэрыканцамі па разьмешчаных там амэрыканскіх актывах, а таксама па гатэлях і іншых аб’ектах. ЗША і Ізраіль працягнулі ўдары па вайсковых аб’ектах Ірану.
8 сакавіка іранская Асамблея экспэртаў абрала Муджтабу Хамэнэі новым кіраўніком краіны. Гэта 56-гадовы сын забітага паветранай атакай Алі Хамэнэі. Жонка Муджтабы Хамэнэі, Захра Хадад Адэль, таксама загінула падчас таго ж амэрыканска-ізраільскага ўдару, у якім быў забіты яе цесьць — найвышэйшы кіраўнік (рахбар) Ірану.