У Польшчы прыпынілі расьсьледаваньне справы супраць экс-судзьдзі Томаша Шмыта, які атрымаў у Беларусі статус палітычнага ўцекача.
Як паведаміла выданьне «Позірк» з спасылкай на Wirtualna Polska, рашэньне ўхвалілі праз немагчымасьць правядзеньня працэсуальных дзеяньняў з удзелам падазраванага.
«Расьсьледаваньне дзейнасьці колішняга судзьдзі Томаша Шмыта было прыпыненае 7 лістапада 2025 году», — паведаміў прэсавы сакратар Нацыянальнай пракуратуры Польшчы Пшэмыслаў Новак.
Паводле яго, раней пракуратура праводзіла збор доказаў, аналізавала дакумэнты і іншыя крыніцы інфармацыі, дапытвала сьведак.
Улады Беларусі не надалі прававой дапамогі польскаму боку ў гэтай справе, сказаў Новак. Ён падкрэсьліў, што статус палітычнага ўцекача экс-судзьдзі выключае магчымасьць яго экстрадыцыі.
ГЛЯДЗІЦЕ ТАКСАМА: Польшча абвясьціла ў вышук свайго грамадзяніна, які ўцёк у Беларусь ад вялікага штрафу за антыўкраінскія допісы13 сьнежня 2024 году акруговы суд у Варшаве выдаў на арышт Шмыта эўрапейскі ордэр. Ён дзейнічае толькі на тэрыторыі дзяржаў, якія ўваходзяць у Эўразьвяз, гэта значыць дакумэнт ня будзе мець рэальнай сілы, пакуль перабежчык не перасячэ мяжу адной з краін ЭЗ.
Пракуратура Польшчы тады паведаміла, што Шмыта вышукваюць з 9 верасьня 2024 году.
Пра тое, што судзьдзя 2-га аддзяленьня Ваяводзкага адміністрацыйнага суда Варшавы Томаш Шмыт уцёк у Беларусь, стала вядома 6 траўня 2024 году з паведамленьня Telegram-канала, створанага за тры дні да таго ад яго імя на польскай і расейскай мовах. У ім сьцьвярджалася, што мужчына вымушана пакінуў Польшчу «з прычыны нязгоды з палітыкай і дзеяньнямі ўладаў». Яму нібыта пагражалі перасьледам «за самастойную палітычную пазыцыю».
Прэм’ер-міністар Польшчы Дональд Туск заявіў 7 траўня 2024 году, што спэцслужбы Беларусі даўно працавалі з Шмытам, яго стасункі з беларусамі «маюць даўнюю гісторыю», гэта ня справа «апошніх месяцаў».
9 траўня 2024 году Шмыта звольнілі з Вышэйшага адміністрацыйнага суда на падставе яго заявы. Нацыянальная пракуратура Польшчы пачала расьсьледаваньне.
Выданьне Gazeta Wyborcza з спасылкай на ўласныя крыніцы паведамляла, што Мазавецкі ваявода на падставе запыту Нацыянальнай пракуратуры Польшчы ануляваў пашпарт перабежчыка.
22 лістапада 2024 году стала вядома, што Аляксандр Лукашэнка даў Шмыту палітычны прытулак.
ГЛЯДЗІЦЕ ТАКСАМА: Польскага палітыка, які балятаваўся ў прэзыдэнты, узнагародзілі ў Беларусі