«У ААЭ тоўстая скура і горкая плоць — мы ня лёгкая здабыча», — працытавала агенцтва DPA Мухамэда бэн Заід аль-Нахаяна. 7 сакавіка ён наведаў параненых у выніку іранскай атакі.
«Мы выканаем свой абавязак перад нашай краінай, нашым народам і нашымі жыхарамі, якія таксама зьяўляюцца часткай нашай сям’і», — дадаў ён.
7 сакавіка іранскі дрон атакаваў аэрапорт Дубая, яго працу часова спынялі. Бесьпілётнік выбухнуў паблізу тэрміналаў, пасьля чаго на аэрапортам падняўся чорны дым. Неўзабаве пасьля гэтага дзейнасьць аэрапорту аднавілі.
Прэзыдэнт Ірану Масуд Пэзэшкіян у сваім відэазвароце 7 сакавіка заявіў, што часовая кіроўная рада краіны вырашыла спыніць атакі на суседнія дзяржавы, калі зь іх тэрыторыі ня будуць наносіць удары.
«Прашу прабачэньня ў суседніх краін. Учора часовая кіроўная рада ўхваліла, што больш ня будзе нападаў на суседнія краіны і запускаў ракет, калі толькі ня будзе атакі на Іран з іх тэрыторыі», — працытавала прэзыдэнта Ірану агенцтва AFP.
У той жа час ён падкрэсьліў, што Іран ня мае намераў уварвацца ў суседнія краіны, але адкінуў патрабаваньне ЗША аб капітуляцыі.
«Безумоўная капітуляцыя Ірану — гэта мара і фантазія, якую ворагі павінны забраць з сабой у магілу», — сказаў Масуд Пэзэшкіян і заклікаў краіны Пэрсыдзкай затокі «не станавіцца марыянэткамі імпэрыялізму». Ён заявіў, што Тэгеран дзейнічае ў межах міжнароднага права.
ГЛЯДЗІЦЕ ТАКСАМА: У ЗША пацьвердзілі, што Расея перадавала Ірану зьвесткі для нанясеньня ўдараў па аб’ектах на Блізкім УсходзеВайсковая апэрацыя ЗША і Ізраілю супраць Ірану
28 лютага Дональд Трамп аб’явіў аб пачатку супольнай з Ізраілем маштабнай ваеннай апэрацыі супраць рэжыму ў Іране. Патрэбу ў апэрацыі зьвязалі з правалам перамоваў аб іранскай ядзернай праграме.
Аятала Алі Хамэнэі й іншыя прадстаўнікі найвышэйшага іранскага кіраўніцтва былі забітыя. Прэзыдэнт Ірану Масуд Пэзэшкіян назваў забойства Хамэнэі страшным злачынствам і паабяцаў адпомсьціць. Іран пачаў апэрацыю ў адказ і нанёс удары па амэрыканскіх аб’ектах на Блізкім Усходзе.
Пераемніка Хамэнэі павінна выбраць рада з 88 багасловаў.
Масква наўпрост асудзіла агрэсію Ізраілю і ЗША супраць Ірану. Улады Беларусі адрэагавалі стрымана. Лукашэнка ў першыя два дні пасьля гібелі Хамэнэі не сказаў ані слова, а МЗС Беларусі 28 лютага двойчы выступіў з заявамі. У адной прагучала заклапочанасьць абвастрэньнем канфлікту вакол Ірану. У другой заяве атака на Іран асуджаецца, але Ізраіль і ЗША не названыя, акцэнт робіцца на гуманітарным аспэкце.
Беларуская дзяржаўная авіякампанія «Белавія» празь небясьпеку ад узаемных абстрэлаў на Блізкім Усходзе скасавала шэраг рэйсаў і 2 сакавіка накіравала эвакуацыйны самалёт зь Менску ў Доху, каб забраць беларускіх турыстаў, што апынуліся ў Катары, які таксама абстрэльваў Іран.
Паводле іранскага таварыства Чырвонага Паўмесяца, у Іране загінулі больш за 200 чалавек, параненыя больш за 700. Паводле іранскага інфармацыйнага агенцтва IRNA, 118 чалавек сярод загінулых — школьнікі.
Афіцыйныя асобы Аб’яднаных Арабскіх Эміратаў заявілі пра трох загінулых і 58 параненых у краіне з пачатку іранскіх атак на рэгіён Пэрсыдзкай затокі, якія сталі адказам на ваенныя апэрацыі ЗША і Ізраілю.
У выніку іранскага ракетнага ўдару па горадзе Бэйт-Шэмэш у Ізраілі, што за 40 км ад Ерусаліму, як мінімум 9 чалавек загінулі і 28 атрымалі раненьні. З пачатку новага абвастрэньня па тэрыторыі Ізраілю рэгулярна б’юць ракетамі.
2 сакавіка да баявых дзеяньняў у рэгіёне далучылася праіранская ісламісцкая групоўка «Хэзбала», якая пачала з тэрыторыі Лібану абстрэльваць Ізраіль.