Прадстаўнік ізраільскай арміі Авіхай Адраі апублікаваў папярэджаньне аб эвакуацыі для тых, хто знаходзіцца ў паўднёвых прадмесьцях Бэйруту.
Паводле зьвестак Арміі абароны Ізраілю (ААІ), ноччу з боку Ірану ў бок Ізраілю былі запушчаныя ракеты, а з тэрыторыі Лібану — два бесьпілётнікі.
ААІ таксама заявіла, што нанесла ўдар і зьняшкодзіла групу зэнітнай артылерыі Ірану, якая спрабавала выкарыстаць сыстэму супраць ізраільскіх ВПС. Цэнтральнае камандаваньне Ўзброеных сілаў ЗША (CENTCOM) паведаміла, што ў ходзе апэрацыяў амэрыканскія войскі зьнішчылі камандна-кантрольныя пункты Корпусу вартавых ісламскай рэвалюцыі, іранскія сродкі супрацьпаветранай абароны, пускавыя пляцоўкі ракет і бесьпілётнікаў, а таксама вайсковыя аэрадромы.
Дзяржаўны сакратар Марка Рубіё заявіў, што ЗША 28 лютага нанесьлі «прэвэнтыўны» ўдар па Іране, бо ведалі, што Ізраіль зьбіраецца ўдарыць па Іране.
«Мы ведалі, што будзе ізраільская апэрацыя. Мы ведалі, што гэта справакуе атаку на амэрыканскія войскі. І мы ведалі, што калі мы не нанясем ім прэвэнтыўны ўдар да таго, як яны пачнуць гэтыя атакі, мы панясём вялікія страты, і, магчыма, нават больш забітых», — цытуе яго BBC News.
Рубіё дадаў, што ня будзе раскрываць дэталяў тактычных дзеяньняў, але «наймацнейшыя ўдары амэрыканскіх вайскоўцаў яшчэ наперадзе».
Уначы Міністэрства абароны Саудаўскай Арабіі паведаміла аб нападзе на пасольства ЗША ў Эр-Рыядзе. Паводле ведамства, па дыпляматычнай місіі запусьцілі два дроны, у выніку атакі «ўзьнік невялікі пажар», будынку прычынена нязначная шкода. Fox News перадае, што ніхто не пацярпеў, падчас удару пасольства было практычна пустым.
Прэзыдэнт ЗША Дональд Трамп заявіў тэлеканалу NewsNation, што Злучаныя Штаты адкажуць на напад на амэрыканскую амбасаду ў Саудаўскай Арабіі.
Паводле Цэнтральнага камандаваньня Ўзброеных сілаў ЗША, пры апэрацыі ў Іране загінулі шэсьць вайскоўцаў. «Амэрыканскія войскі нядаўна выявілі целы двух вайскоўцаў, якія раней лічыліся зьніклымі бязь вестак, на абʼекце, які пацярпеў пры першых нападах Ірану ў рэгіёне», — гаворыцца ў паведамленьні.
ГЛЯДЗІЦЕ ТАКСАМА: Узброеныя сілы ЗША заявілі аб зьнішчэньні 11 іранскіх вайсковых караблёўВайсковая апэрацыя ЗША і Ізраілю супраць Ірану
28 лютага Дональд Трамп аб’явіў аб пачатку супольнай з Ізраілем маштабнай ваеннай апэрацыі супраць рэжыму ў Іране. Патрэбу ў апэрацыі зьвязалі з правалам перамоваў аб іранскай ядзернай праграме.
Аятала Алі Хамэнэі й іншыя прадстаўнікі найвышэйшага іранскага кіраўніцтва былі забітыя. Прэзыдэнт Ірану Масуд Пэзэшкіян назваў забойства Хамэнэі страшным злачынствам і паабяцаў адпомсьціць. Іран пачаў апэрацыю ў адказ і нанёс удары па амэрыканскіх аб’ектах на Блізкім Усходзе.
Пераемніка Хамэнэі павінна выбраць рада з 88 багасловаў.
Масква наўпрост асудзіла агрэсію Ізраілю і ЗША супраць Ірану. Улады Беларусі адрэагавалі стрымана. Лукашэнка ў першыя два дні пасьля гібелі Хамэнэі не сказаў ані слова, а МЗС Беларусі 28 лютага двойчы выступіў з заявамі. У адной прагучала заклапочанасьць абвастрэньнем канфлікту вакол Ірану. У другой заяве атака на Іран асуджаецца, але Ізраіль і ЗША не названыя, акцэнт робіцца на гуманітарным аспэкце.
Беларуская дзяржаўная авіякампанія «Белавія» празь небясьпеку ад узаемных абстрэлаў на Блізкім Усходзе скасавала шэраг рэйсаў і 2 сакавіка накіравала эвакуацыйны самалёт зь Менску ў Доху, каб забраць беларускіх турыстаў, што апынуліся ў Катары, які таксама абстрэльваў Іран.
Паводле іранскага таварыства Чырвонага Паўмесяца, у Іране загінулі больш за 200 чалавек, параненыя больш за 700. Паводле іранскага інфармацыйнага агенцтва IRNA, 118 чалавек сярод загінулых — школьнікі.
Афіцыйныя асобы Аб’яднаных Арабскіх Эміратаў заявілі пра трох загінулых і 58 параненых у краіне з пачатку іранскіх атак на рэгіён Пэрсыдзкай затокі, якія сталі адказам на ваенныя апэрацыі ЗША і Ізраілю.
У выніку іранскага ракетнага ўдару па горадзе Бэйт-Шэмэш у Ізраілі, што за 40 км ад Ерусаліму, як мінімум 9 чалавек загінулі і 28 атрымалі раненьні. З пачатку новага абвастрэньня па тэрыторыі Ізраілю рэгулярна б’юць ракетамі.
2 сакавіка да баявых дзеяньняў у рэгіёне далучылася праіранская ісламісцкая групоўка «Хэзбала», якая пачала з тэрыторыі Лібану абстрэльваць Ізраіль.