«Два дні таму іранскі рэжым меў 11 суднаў у Аманскім заліве, зараз няма ніводнага», — гаворыцца ў паведамленьні ведамства.
У ім зазначаецца, што іранскі рэжым «дзесяцігодзьдзямі перасьледаваў і атакаваў міжнароднае суднаходзтва ў Аманскім заліве. Гэты час прайшоў». Да паведамленьня дададзена відэа, на якім меркавана паказаны ўдар па адным з іранскіх судоў.
Раней у ведамстве адпрэчылі сьцьвярджэньні Тэгерана аб тым, што іранскім вайскоўцам удалося паразіць амэрыканскі авіяносец. У камандаваньні адзначылі, што адзіны авіяносец, які паразілі падчас баявых дзеяньняў — гэта іранскі ваенны карабель Shahid Bagheri, на палубе якога могуць быць разьмешчаныя дроны. У паведамленьні наўпрост ня сказана, што карабель быў затоплены. Выданьне Naval News раней пацьвердзіла інфармацыю амэрыканскіх вайскоўцаў аб затапленьні іранскага карвэта клясу Jamaran ля пірса ў Чах-Бэхар у Аманскім заліве.
Прэзыдэнт ЗША Дональд Трамп раней заявіў, што каля 10 іранскіх караблёў ужо «ляжаць на дне марскім». Ён адзначыў, што ўдары па іранскім флёце будуць працягвацца. Зьнішчэньне іранскага ваенна-марскога флёта было раней названа адной з мэтаў апэрацыі ЗША, нароўні з уціскам ракетнага патэнцыялу Ірана і перашкодай яго ядзернай праграме.
Іранскія ўлады афіцыйна не паведамлялі пра магчымую шкоду, нанесеную ВМС краіны.
Вайскова-марскі флёт Ірана ўключае ў сябе некалькі дзясяткаў падводных лодак, некалькі фрэгатаў і карвэтаў, а таксама дзясяткі ракетных катэраў, дэсантных і патрульных судоў.
ГЛЯДЗІЦЕ ТАКСАМА: «Невыносная пагроза». Трамп выказаўся пра мэты вайны супраць ІрануВайсковая апэрацыя ЗША і Ізраілю супраць Ірану
28 лютага Дональд Трамп аб’явіў аб пачатку супольнай з Ізраілем маштабнай ваеннай апэрацыі супраць рэжыму ў Іране. Патрэбу ў апэрацыі зьвязалі з правалам перамоваў аб іранскай ядзернай праграме.
Аятала Алі Хамэнэі й іншыя прадстаўнікі найвышэйшага іранскага кіраўніцтва былі забітыя. Прэзыдэнт Ірану Масуд Пэзэшкіян назваў забойства Хамэнэі страшным злачынствам і паабяцаў адпомсьціць. Іран пачаў апэрацыю ў адказ і нанёс удары па амэрыканскіх аб’ектах на Блізкім Усходзе.
Пераемніка Хамэнэі павінна выбраць рада з 88 багасловаў.
Масква наўпрост асудзіла агрэсію Ізраілю і ЗША супраць Ірану. Улады Беларусі адрэагавалі стрымана. Лукашэнка ў першыя два дні пасьля гібелі Хамэнэі не сказаў ані слова, а МЗС Беларусі 28 лютага двойчы выступіў з заявамі. У адной прагучала заклапочанасьць абвастрэньнем канфлікту вакол Ірану. У другой заяве атака на Іран асуджаецца, але Ізраіль і ЗША не названыя, акцэнт робіцца на гуманітарным аспэкце.
Беларуская дзяржаўная авіякампанія «Белавія» празь небясьпеку ад узаемных абстрэлаў на Блізкім Усходзе скасавала шэраг рэйсаў і 2 сакавіка накіравала эвакуацыйны самалёт зь Менску ў Доху, каб забраць беларускіх турыстаў, што апынуліся ў Катары, які таксама абстрэльваў Іран.
Паводле іранскага таварыства Чырвонага Паўмесяца, у Іране загінулі больш за 200 чалавек, параненыя больш за 700. Паводле іранскага інфармацыйнага агенцтва IRNA, 118 чалавек сярод загінулых — школьнікі.
Афіцыйныя асобы Аб’яднаных Арабскіх Эміратаў заявілі пра трох загінулых і 58 параненых у краіне з пачатку іранскіх атак на рэгіён Пэрсыдзкай затокі, якія сталі адказам на ваенныя апэрацыі ЗША і Ізраілю.
У выніку іранскага ракетнага ўдару па горадзе Бэйт-Шэмэш у Ізраілі, што за 40 км ад Ерусаліму, як мінімум 9 чалавек загінулі і 28 атрымалі раненьні. З пачатку новага абвастрэньня па тэрыторыі Ізраілю рэгулярна б’юць ракетамі.
2 сакавіка да баявых дзеяньняў у рэгіёне далучылася праіранская ісламісцкая групоўка «Хэзбала», якая пачала з тэрыторыі Лібану абстрэльваць Ізраіль.