У Пакістане пратэстоўцы напалі на амэрыканскае пасольства. Іран атакаваў краіны Пэрсыдзкай затокі. У Тэгеране зноў гучаць выбухі

Большасьць пратэстоўцаў — студэнты рэлігійнай школы, адзначае Радыё Фарда. Пратэстоўцы разьбілі вокны. Сілавікі ўжылі зброю. Загінулі як мінімум 9 чалавек.

Вакол консульства ЗША ў Пэшавары і амбасады ЗША ў Ісламабадзе ўведзены рэжым падвышанай небясьпекі. Там таксама зьбіраюцца студэнты-пратэстоўцы.

Супрацоўнікі амбасады ЗША ў Амане пераведзеныя ў сховішчы. Амбасада заклікала грамадзянаў ЗША таксама знайсьці бясьпечнае сховішча, сачыць за мясцовымі СМІ і трымаць сродкі сувязі зараджанымі.

У Іране зноў гучаць выбухі

Днём 1 сакавіка ў Іране зноў гучаць выбухі

Мясцовыя СМІ паведамілі пра некалькі выбухаў у сталіцы краіны Тэгеране. Таксама ў нядзелю Армія абароны Ізраілю паведаміла, што наносіць удары па цэлях, «якія належаць іранскаму тэрарыстычнаму рэжыму ў самым сэрцы Тэгерана».

Іранскія ўлады пацьвердзілі, што ў выніку ўдараў ЗША і Ізраілю ў Тэгеране разам з аяталай Алі Хамэнэі загінулі некалькі ключавых вайсковых і сілавых кіраўнікоў. Сярод іх — камандуючы сухапутнымі войскамі Корпусу вартавых ісламскай рэвалюцыі (КВІР) генэрал Махамад Пакпур і высокапастаўлены дарадца абарончага савету Алі Шамхані.

У краіне абвешчана агульнанацыянальная жалоба і запушчаны часовы мэханізм кіраваньня да абраньня новага вярхоўнага лідэра Радай экспэртаў.

У ноч на 1 сакавіка Іран у адказ на амэрыкана-ізраільскія ўдары атакаваў Ізраіль і краіны Пэрсыдзкай затокі

Ізраіль

У Тэль-Авіве іранская балістычная ракета разбурыла жылы дом і пашкодзіла яшчэ 40 суседніх будынкаў. Два чалавекі загінулі, 27 атрымалі раненьні. Вядома, што адна з загінулых — працоўная з Філіпінаў. Пра сьмерць другой мясцовай жыхаркі стала вядома раніцай 1 сакавіка. Яна памерла па дарозе ў бамбасховішча, магчыма, ад сардэчнага прыступу.

Выбух у Тэль-Авіве 28 лютага

Усяго за суткі ў Ізраілі ў бальніцы даставілі 456 чалавек, 86 зь іх былі шпіталізаваныя.

Абстрэлы Ізраілю з боку Ірану працягваліся ўсю ноч. Многія ізраільцяне правялі яе ў грамадзкіх бамбасховішчах. Уначы і раніцай сырэны гучалі ў цэнтры краіны, у Хайфе, Галілеі, на Галянскіх вышынях і ў Самарыі.

ААЭ

Іранскія дроны атакавалі славуты дубайскі гатэль «Бурдж-эль-Араб», а таксама аэрапорт. Зьбітыя іранскія дроны ўпалі ў дварах жылых дамоў, пацярпелі два чалавекі.

Паводле словаў мясцовых жыхароў, за раніцу ў небе над горадам прагучала каля 20 гучных выбухаў.

Людзі працягваюць адпачываць на пляжы, тым часам над гатэлем «Бурдж-эль-Араб» уздымаецца дым пасьля атакі Ірана

У Абу-Дабі зафіксаваныя выбухі і праца сыстэм СПА. Паводле відавочцаў, гучныя гукі былі чутныя ў раёне мячэці шэйха Заіда, у небе назіраліся сьляды перахопаў.

На мабільныя тэлефоны жыхароў і турыстаў паступілі паведамленьні з патрабаваньнем знаходзіцца ў сховішчах. Інфармацыя пра пацярпелых удакладняецца.

Міністэрства абароны ААЭ паведаміла, што сыстэмы СПА за апошнія суткі адбілі маштабную атаку з боку Ірану. Зафіксаваныя запускі 137 ракет і больш як 200 бесьпілётнікаў. 132 ракеты былі перахопленыя, яшчэ пяць упалі ў моры. Больш за 10 дронаў упалі на тэрыторыі краіны, астатнія былі зьнішчаныя.

Бахрэйн

Атакаваны гатэль Crowne Plaza Manama.

Пажар у Бахрэйне пасьля ўдару іранскага дрона

Пашкоджаны гатэль Crown Plaza ў Досе

Катар

У сталіцы Досе пад удар трапіў прамысловы раён.

Аман

Два іранскія бесьпілётнікі атакавалі порт і паранілі аднаго чалавека. Раней Аман выступаў пасярэднікам у непрамых перамовах паміж Іранам і ЗША.

Ірак

Атакаваная амэрыканская авіябаза ў Эрбілі. Старшыня парлямэнту Ірана Махамад-Багер Галібаф абвясьціў, што атакі на амэрыканскія і ізраільскія аб’екты ў рэгіёне працягнуцца. Прэзыдэнт ЗША Дональд Трамп у сацсетцы Truth заклікаў Іран устрымацца ад гэтага.

У Багдадзе і ягоных ваколіцах уведзены рэжым павышанай гатоўнасьці. Аэрапорт Багдаду часткова закрыты для грамадзянскіх рэйсаў, узмоцненыя меры бясьпекі на ўездах у горад. Паведамленьняў пра выбухі ў цэнтры сталіцы раніцай 1 сакавіка няма.

Паводле папярэдніх дадзеных Пэнтагону, стратаў сярод амэрыканскіх вайскоўцаў няма.

Акцыі ў Іране

У Іране прыхільнікі ісламскай рэспублікі сабраліся ў Тэгеране і іншых гарадах, у тым ліку ў Тэбрызе, Мэшхедзе, Ісфахане, Ахвазе і Керманшаху, каб ушанаваць памяць аяталы Хамэнэі. Яны размахвалі чорнымі сьцягамі і скандавалі: «Сьмерць Амэрыцы» і «Сьмерць Ізраілю».

Арганізацыя рэлігійных саветаў паведаміла пра пераўтварэньне рэлігійных групаў у «раённыя штабы супраціву», якія будуць займацца «прадухіленьнем дэструктыўных наратываў» і падрыхтоўкай да «кіраваньня інфармацыйным вакуумам».

У той жа час Reuters са спасылкай на відавочцаў паведамляе, што некаторыя іранцы выйшлі на вуліцы Тэгерану, Кярэджу і Ісфахану, каб адзначыць гібель аяталы. У сацсетках зьявіліся відэа, якія цяжка вэрыфікаваць ва ўмовах блякаваньня інтэрнэту.

Іранская служба Бі-бі-сі сьцьвярджае, што журналістам удалося пацьвердзіць некалькі відэа, дзе людзі радуюцца і сыгналяць аўтамабілямі. Паводле The New York Times, журналісты выданьня зьвязаліся з жыхарамі Тэгерану, якія паказалі кадры, на якіх людзі танчаць і крычаць «Свабода!».

Агенцтва Reuters паведаміла пра зьнішчэньне помніка аяталу Хамэнэі ў горадзе Галедар.

Рада бясьпекі ААН правяла экстранае пасяджэньне

Пасяджэньне ААН 28 лютага

Генэральны сакратар Антоніу Гутэрыш асудзіў удары ЗША і Ізраілю па Іране і атакі Тэгерана ў адказ, якія, паводле ягоных слоў, парушылі сувэрэнітэт Бахрэйна, Іраку, Ярданіі, Кувэйту, Катару, Саудаўскай Арабіі і ААЭ.

Францыя, па ініцыятыве якой было скліканае пасяджэньне, асудзіла ўдары Ірана па краінах рэгіёну. Расея падтрымала Іран, назваўшы дзеяньні ЗША і Ізраіля «актам агрэсіі». Прадстаўнікі Ізраілю і ЗША патлумачылі ваенную апэрацыю неабходнасьцю прадухіленьня «істотнай пагрозы».

Іран назваў амэрыкана-ізраільскія атакі парушэньнем Статуту ААН і заявіў пра «законнае права на самаабарону».