Лукашэнка дазволіў яшчэ адной кампаніі займацца экспартам вайсковай прадукцыі. Што пра яе вядома

Аляксандар Лукашэнка ўключыў закрытае акцыянэрнае таварыства «ГрандСпэцТрэйдынг» у пералік спэцыяльных экспартэраў, якія маюць права займацца пастаўкамі «спэцыфічных тавараў» — звычайна гэта прадукцыя вайсковага або падвойнага прызначэньня.

Адпаведны ўказ абнародавалі на Нацыянальным праўным партале Беларусі.

Раней, згодна з указам аб некаторых пытаньнях дзяржаўнага рэгуляваньня вайскова-тэхнічнай супрацы Беларусі з замежнымі краінамі і аб экспартным кантролі, вайсковымі пастаўкамі маглі займацца тры дзяржаўныя беларускія кампаніі — «Белзьнешпрамсэрвiс», «Белспэцзьнештэхнiка» і «Белтэхэкспарт».

ГЛЯДЗІЦЕ ТАКСАМА: Ва Ўкраіне раскрылі схему паставак для расейскага ВПК, за якой стаіць інжынэр зь Беларусі

Што вядома пра новага спэцыяльнага экспартэра

Як вынікае з базы kartoteka.by, кампанію зарэгістравалі некалькі месяцаў таму «ГрандСпэцТрэйдынг» — 13 лістапада 2025 году. Яе юрыдычны адрас — у Менску на вуліцы Сухараўскай, 16. Пад гэтым адрасам месьціцца гандлёвы цэнтар «Праздник».

Згодна з заканадаўствам Беларусі, зьвесткі аб акцыянэрах закрытых акцыянэрных таварыстваў непублічныя, таму канцавыя бэнэфіцыяры ў Адзіным дзяржаўным рэестры без спэцыяльнага запыту не раскрываюцца.

У пераліку прадпрыемстваў, якія падпарадкоўваюцца Дзяржаўнаму вайскова-прамысловаму камітэту Беларусі, ЗАТ «ГрандСпэцТрэйдынг» няма.

ГЛЯДЗІЦЕ ТАКСАМА: «Больш траціць немагчыма». Як расьце вайсковы бюджэт Беларусі і на што ідуць грошы