«Тым больш што я выпісаў асноўныя пытаньні, якія дагэтуль вісяць, як гэта журналісты кажуць, на старонках асноўных інфармацыйных рэсурсаў. Я, можа, нават і не зьвяртаў бы на гэта ўвагі, але некаторыя, нават расейцы, пачалі на гэта рэагаваць», — цытуе Лукашэнку БелТА.
У прыватнасьці, Лукашэнка запэўніў, што яго размова з Уладзімірам Пуціным 8 лютага была прысьвечана не паездцы на Раду міру 19 лютага ў ЗША, а паседжаньню найвышэйшага дзяржаўнага савету так званай саюзнай дзяржавы, якое мае адбыцца 26 лютага.
«Сёньня агляд атрымаў: у Расеі некаторыя гавораць, што нехта спрабуе адарваць Беларусь ад Расеі. Я ня буду нават камэнтаваць. Скажу толькі адно: няма той сілы, якая сёньня здольная адарваць Беларусь ад Расеі і Расею ад Беларусі. Акалічнасьці так склаліся, што яны нас разам зьвязалі, мусіць, на доўгія-доўгія дзесяцігодзьдзі і стагодзьдзі. Хоць, увогуле, нас няма ў чым папракнуць — Беларусь — мы заўсёды арыентаваныя на Расею. Там нашае многае, калі ня ўсё. Там нашыя рэсурсы, там наш рынак, калі пра эканоміку. У нас поўнае адзінства ў гэтым пляне. Дый у палітычным», — сказаў ён.
Лукашэнка пры гэтым заявіў, што будзе ўдзельнічаць у Радзе міру, але пазьней:
«Можа, не ў Вашынгтоне. Дзесьці ў Эўропе ці на Блізкім Усходзе, можа быць, у Ізраілі, бліжэй тут, у Турэччыне адбудуцца далейшыя пасяджэньні гэтай Рады».
Ён дадаў, што Беларусь традыцыйна трансьлюе мірны парадак дня, заўсёды выступае за мірнае ўрэгуляваньне канфліктаў, і ў гэтым кантэксьце яна гатовая ўдзельнічаць у працы Рады міру.
На мінулым тыдні Служба вонкавай выведкі Расеі (СВР) апублікавала папярэджаньне аб нібыта плянах Захаду што да Беларусі — маўляў, заходнія краіны шукаюць у Беларусі новых «лібэральных пасіянарыяў», якія змогуць аслабіць сувязі Менску і Масквы.
Днямі сакратар Савету бясьпекі Беларусі Аляксандар Вальфовіч таксама адрэагаваў на заявы з Масквы аб тым, што ЗША, Вялікая Брытанія, Германія і Польшча нібыта рыхтуюць новую спробу зьмяніць канстытуцыйны лад у Беларусі.
«Нічога новага. Ніводзін урад — ні Польшчы, ні Літвы, ні Латвіі — не ідзе на канструктыўны дыялёг, ня хоча весьці нармальную міжнародную практыку, як гэта прынята ў сьвеце: па лініі міністэрстваў замежных спраў знаходзіць шляхі вырашэньня тых праблемных пытаньняў, якія ёсьць паміж дзьвюма дзяржавамі. Мы не ўшчамляем інтарэсы Польшчы і краін Прыбалтыкі, мы не дыктуем ім, як жыць. І ня трэба нам дыктаваць», — сказаў Аляксандр Вальфовіч.
ГЛЯДЗІЦЕ ТАКСАМА: У Расеі заявілі, што ня будуць склаўшы рукі назіраць за тым, што адбываецца ў Беларусі, і згадалі ядзерную зброю ГЛЯДЗІЦЕ ТАКСАМА: Папярэджаньне Лукашэнку? Што насамрэч стаіць за заявай расейскай выведкі пра Беларусь ГЛЯДЗІЦЕ ТАКСАМА: Аб’яднаны пераходны кабінэт Беларусі адказаў на заявы спэцслужбаў і МЗС Расеі