Ужо сёньня: 105 гадоў таму нарадзіўся Іван Шамякін

Дата дня

30 студзеня 1921 году ў сялянскай сям’і на Гомельшчыне нарадзіўся Іван Шамякін — у будучыні народны пісьменьнік, ляўрэат шматлікіх дзяржаўных і літаратурных прэміяў і ганаровых званьняў. Аўтар такіх беларускіх бэстсэлераў 1960–80-х гадоў, як «Сьнежныя зімы», «Сэрца на далоні», «Атлянты і карыятыды», «Трывожнае шчасьце». Адзін з самых выдаваных беларускіх празаікаў.

Таксама ў гэты дзень

1922 — у Менску быў створаны Інстытут беларускай культуры (Інбелкульт), першая ў Беларусі вышэйшая шматгаліновая навукова-дасьледчая ўстанова. Тут працавалі Янка Купала, Аркадзь Смоліч і Ўсевалад Ігнатоўскі. У 1928 годзе Інбелкульт быў рэарганізаваны ў Акадэмію навук.

Навуковая камісія Інстытуту беларускай культуры (Інбелкульту), 1922 год, Менск

1925 — заснаваны Бярэзінскі біясфэрны запаведнік.

1946 — у Менску паводле судовага прысуду публічна павесілі 14 нацысцкіх афіцэраў.

1972 — ангельскія дэсантнікі застрэлілі 13 ірляндзкіх дэманстрантаў, якія пратэставалі супраць брытанскага кіраваньня ў Паўночнай Ірляндыі. У 2010 годзе прэм’ер-міністар Вялікай Брытаніі Дэвід Кэмэран папрасіў прабачэньня ад імя дзяржавы.

Брытанскі салдат цягне каталіцкага пратэстоўца падчас «Крывавай нядзелі» ў Лёндандэры, 30 студзеня 1972 году

1975 — у Менску адкрыўся кінатэатар «Кастрычнік».

Кінатэатар «Кастрычнік» у Менску

1992 — Беларусь прынялі ў Арганізацыю бясьпекі і супрацоўніцтва ў Эўропе (АБСЭ).

2023 — у продаж паступіла кніга Карнея Чукоўскага «Добры доктар БудзьЗдароў», пераклад якой на беларускую зрабіў у турме Андрэй Скурко.

У гэты дзень нарадзіліся

1833 — Апалінар Гараўскі, беларускі пэйзажыст.

1882 — Франклін Дэлана Рузвэльт, 32 прэзыдэнт ЗША.

Франклін Рузвэльт, сьнежань 1941

1895 — Кірыла Арлоўскі, адзін з кіраўнікоў партызанскага руху ў Заходняй Беларусі і падчас Другой усясьветнай вайны.

1921 — Іван Шамякін, беларускі пісьменьнік.

Іван Шамякін у сваёй роднай вёсцы Карма Добрускага раёну

1923 — Леанід Гайдай, савецкі кінарэжысэр.

Леанід Гайдай і Юры Нікулін

1935 — Эрнст Ляўкоў, беларускі навуковец, геоляг і краязнаўца, аўтар кнігі пра культавыя валуны Беларусі, адзін з стваральнікаў Парку валуноў у Менску.

У памяці

1649 — падчас Ангельскай рэвалюцыі пакараны сьмерцю кароль Карл І Ст’юарт.

1948 — Махатма Гандзі, лідэр індыйскага нацыяналізму.

Махатма Гандзі

«Спачатку яны ігнаруюць цябе, пасьля сьмяюцца. Пасьля яны бʼюць цябе, пасьля ты перамагаеш».