У Міністэрстве энэргетыкі Беларусі паведамілі аб завяршэньні ўсіх работ для аднаўленьня цепламагістралі, праз аварыю на якой 19 студзеня некалькі раёнаў Менску засталіся безь цяпла.
Як адзначаецца ў паведамленьні ведамства, цяпер сыстэма забесьпячэньня сталіцы цяплом функцыянуе ў штатным рэжыме, а гідраўлічныя і тэмпэратурныя парамэтры адпавядаюць нормам.
«Забясьпечана стабільная падача цяпла», — дадалі ў Міністэрстве энэргетыкі.
У аднаўленьні цеплатрасы ўсе гэтыя дні ўдзельнічалі больш за 200 адмыслоўцаў, аварыйныя брыгады працавалі дзень і ноч.
ГЛЯДЗІЦЕ ТАКСАМА: У камунальнай службе Менску паведамілі аб аднаўленьні забесьпячэньня цяплом у двух раёнах горадуПасьля аварыі 19 студзеня на адной зь менскіх цепламагістраляў зьнікла цяпло ў Фрунзэнскім (вуліцы Шаранговіча, акадэміка Фёдарава, Скрыпнікава, Лабанка) і Кастрычніцкім (вуліца Чкалава) раёнах.
20 студзеня пачалі дэмантаж пашкоджанага ўчастку цеплатрасы і ўсталяваньне новага кампэнсаторнага трубаправоду. Гэта рабілі яшчэ і 21 студзеня.