За дзень да гэтага, 19 студзеня, не было зафіксавана перавышэньняў гранічна дапушчальных канцэнтрацый (ГДК) забруджвальных рэчываў. Аднак да раніцы аўторка становішча зьмянілася, піша «Менск-навіны».
Аўтаматычныя станцыі маніторынгу, разьмешчаныя на праспэкце Незалежнасьці, вуліцах Ціміразева і Радыяльнай, а таксама ў мікрараёне Ўручча, паказалі павышэньне ўзроўню забруджваньня. Максымальныя аднамомантавыя канцэнтрацыі аксіду азоту дасягнулі 2,5 ГДК.
Адмыслоўцы Рэспубліканскага цэнтру гідрамэтэаралёгіі тлумачаць гэта як натуральную зьяву — паверхневую інвэрсію. Пры такіх мэтэаралягічных умовах утвараюцца паветраныя слаі, якія перашкаджаюць расьсейваньню выкідаў і спрыяюць назапашваньню забруджвальных рэчываў каля зямлі.
Асноўнымі крыніцамі аксіду азоту ў горадзе называюць аўтатранспарт і прамысловыя прадпрыемствы.
Празь неспрыяльныя мэтэаралягічныя ўмовы «Белгідрамэт» ужо накіраваў папярэджаньні буйным прамысловым і транспартным прадпрыемствам гораду.
ГЛЯДЗІЦЕ ТАКСАМА: Тарантулы, шакалы і ўласны вінаград. Як глябальнае пацяпленьне можа зьмяніць Беларусь