Сайт Myfin.by вывучыў рэпэртуар менскіх тэатраў і расказаў пра самыя цікавыя прэмʼеры.
Тэатар опэры і балета падрыхтаваў некалькі прэмʼер:
Опэру «Аціс і Галятэя» — міталягічны сюжэт пра пачуцьці німфы і пастуха. Бліжэйшыя паказы адбудуцца ў лютым.
Опэру «Набука» — 21 і 22 сакавіка адбудзецца прэмʼера вядомай опэры Джузэпэ Вэрдзі на італьянскай мове. Гэта гісторыя пра рэлігію, барацьбу за ўладу і сілу каханьня.
Беларускі дзяржаўны музычны тэатар
6 сакавіка адбудзецца прэмʼера рок-н-рольнага мʼюзыклу «Дзяўчаты» і ў гэтым жа месяцы пройдзе адразу 4 паказы.
Прэмʼерны паказ вадэвілю «Утаймаваньне мужчын» пройдзе 30 красавіка. Пацешныя пэрсанажы ў камічных гісторыях, выкліканых любоўнымі інтрыгамі і нечаканымі паваротамі лёсу.
НАДТ ім. Максіма Горкага
5 лютага ў Нацыянальным акадэмічным драматычным тэатры ім. Максіма Горкага адбудзецца прэмʼера «Асоабліва небясьпечныя пэнсіянэры». Гэта дэтэктыўная камэдыя аб пэнсіянэры-сьледчым, якому зноў давядзецца выходзіць на працу. Прычына — выкраданьне яго экс-начальніка.
Нацыянальны акадэмічны тэатар ім. Янкі Купалы
У лютым пакажуць камэдыйны спэктакаль «Гэта цудоўнае жыцьцё»: гісторыю творчай сямʼі, жыцьцё якой пераварочваецца з ног на галаву пасьля адной навіны. Пастаноўка заслужанага артыста Расеі Андрэя Завадзюка, ідзе п'еса «пераважна на беларускай мове з уключэннем расейскай».
Беларускі дзяржаўны тэатар лялек
Спэктакаль «Хутар» па матывах аповесьці Васіля Быкава. Гэта пастаноўка аб трагедыі акупацыі празь лёсы беларускіх сялян, аб людзях, якія спрабуюць выжыць у суровых умовах. У студзені-лютым будзе 4 паказы гэтага спэктакля. Усе квіткі ўжо раскупленыя.
Рэспубліканскі тэатар беларускай драматургіі
У канцы сьнежня адбылася прэмʼера гістарычнай навэлы «Ладзьдзя роспачы», прысьвечаная 95-годзьдзю зь дня нараджэньня Ўладзіміра Караткевіча. Усе квіткі ў студзені-сакавіку ўжо выкупленыя.
Маладзёжны тэатар эстрады
У лютым тут пройдзе прэмʼера «Містычнага мʼюзыклу» паводле кнігі Булгакава «Майстар і Маргарыта».
Драматычны тэатар Беларускай Арміі
Тут у сьнежні адбылася прэмʼера монаспэктакля «Абсалютнае шчасьце», які, паводле афішы, «падорыць падарожжа ў глыбіні чалавечай душы і поўную трансфармацыю галоўнага героя на шляху да спазнаньня сябе». Бліжэйшы паказ адбудзецца 24 лютага.
Тэатар юнага гледача
У сьнежні адбылася прэмʼера вядомай трагедыі «Макбэт» паводле пʼесы Шэкспіра аб сіле ўлады. У лютым пакажуць спэктакль «Вожык у тумане» — добрую гісторыю для дарослых і дзяцей.
ГЛЯДЗІЦЕ ТАКСАМА: У Беларусі 28 тэатраў атрымаюць дзяржаўную падтрымку