Карціна Марка Шагала «Прагулка» захоўваецца за мяжой, у Расеі. Пра гэта ў этэры тэлеканалу АНТ расказала дырэктарка Нацыянальнага мастацкага музэю Ірына Мацяс, паведамляе БелТА.
«На жаль, у Беларусі не засталося такіх шэдэўраў Шагала або Малевіча, якія ёсьць у калекцыях расейскіх ці эўрапейскіх музэяў. Але ў нас падпісана пагадненьне аб супрацы з Расейскім музэем. І ў красавіку будуць праходзіць дні гэтага музэю ў Нацыянальным мастацкім музэі, калі яны прывязуць „Прагулку“ Матка Шагала».
«Прагулка» Марка Шагала
Таксама дырэктарка музэю сказала, што паказаць усе работы славутага мастака складана.
«У 2027 годзе спаўняецца 140 гадоў з дня нараджэньня мастака, і было б вельмі добра зрабіць вялікі праект з гэтай нагоды», — дадала дырэктарка музэю.
Марк Шагал нарадзіўся ў 1887 годзе ў мястэчку Лёзна, ягоны творчы лёс найбольш зьвязаны зь Віцебскам. Шагал — адзін з найбольш знакамітых ураджэнцаў Беларусі, таленавіты жывапісец і графік, яскравы прадстаўнік мастацкага авангарду ХХ стагодзьдзя.
ГЛЯДЗІЦЕ ТАКСАМА: «White Russia», «Russian Empire», «Born in Belarus». Як беларускіх мастакоў пераймяноўваюць у сусьветных музэях