Авіякампанія Belavia нагадала пасажырам пра новыя патрабаваньні, уведзеныя іміграцыйнымі ўладамі краіны. Асаблівую ўвагу на гэта варта зьвярнуць пасажырам навагодняга рэйсу B2 735 зь Менску ў Тбілісі, які адпраўляецца ў ноч на 31 сьнежня. Яны будуць аднымі з першых, на каго распаўсюдзяцца новыя правілы.
Згодна з грузінскім законам «Аб турызьме», падчас рэгістрацыі трэба прад’явіць арыгінал полісу страхаваньня на грузінскай або ангельскай мове. Мэдыцынская страхоўка павінна пакрываць увесь пэрыяд знаходжаньня турыстаў у Грузіі, уключаючы даты прыбыцьця і ад’езду.
Як адзначае авіякампанія, калі ў чалавека ня будзе такога страхаваньня, яму адмовяць ў рэйсе.
Такія патрабаваньні павінны былі быць уведзеныя ў Грузіі яшчэ ў чэрвені мінулага году. На той момант плянавалася, што ўсе замежнікі, якія ўяжджаюць у краіну, павінны будуць мець мэдыцынскае страхаваньне з пэўным узроўнем пакрыцьця. Аднак іх увядзеньне адклалі да 1 студзеня 2026 году.
ГЛЯДЗІЦЕ ТАКСАМА: Камітэт правоў чалавека ААН забараніў Грузіі дэпартаваць беларускага праваабаронцу ГЛЯДЗІЦЕ ТАКСАМА: Жыцьцё без дакумэнтаў. Што адбываецца зь беларусамі Грузіі, у якіх скончыліся тэрміны дзеяньня пашпартоў