Падвышэньне мінімальнага заробку і падаткаў, новыя абмежаваньні для ІП. Якія зьмены чакаюць беларусаў з 1 студзеня

Выходныя ў 2026 годзе

У наступным годзе ў жыхароў Беларусі будуць некалькі доўгіх выходных.

• Студзень: 1–4 (чацьвер–нядзеля).
• Красавік: 18–21 (субота–аўторак; дзякуючы пераносу працоўнага дня з 20 красавіка на 25 красавіка, будуць чатыры выходныя дні запар на Радаўніцу).
• Травень: 1–3 (пятніца–нядзеля).
• Ліпень: 3–5 (пятніца–нядзеля).
• Сьнежань: 25–27 (пятніца–нядзеля).

Вырасьце базавая велічыня

З 1 студзеня базавая велічыня складзе 45 рублёў. У 2025 годзе яна складала 42 рублі.

Базавая велічыня вызначае памер многіх сацыяльных выплатаў, штрафаў, дзяржаўных мытаў, падаткаў і збораў.

Напрыклад, штраф за паездку безь білету складае 0,5-1 б. в. З 1 студзеня ён складзе 22,5 — 45 рублёў. Дзяржаўная пошліна за выдачу новага пашпарту ў звычайным парадку складае 1 базавую велічыню, што будзе раўняцца 45 рублям.

Штраф за перавышэньне хуткасьці можа складаць ад 1 да 12 базавых велічынь (з 1 студзеня — ад 45 да 500 рублёў), піша праект money.onliner.

Вырасьце мінімальны заробак

З 1 студзеня 2026 году мінімальны заробак у краіне складзе 858 рублёў — гэта ніжняя мяжа выплаты за працу, якую павінны выконваць усе працадаўцы: у дзяржаўных і прыватных арганізацыях, у індывідуальных прадпрымальнікаў і аб’яднаньняў домаўладальнікаў.

Павышэньне мінімальнай заработнай платы таксама прывядзе да павелічэньня:

• выплатаў працадаўцам за працаўладкаваньне моладзі, інвалідаў і іншых катэгорый на субсыдыйных працоўных месцах;
• мінімальных дапамогаў па цяжарнасьці і доглядзе дзіцяці.

Вырастуць зарплаты бюджэтнікаў

З 1 студзеня базавы памер аплаты ў дзяржаўным сэктары будзе павышаны да 297 рублёў.

Гэтым разам базавы памер павялічыцца на 8,8% — з 273 да 297 рублёў.

Новы парадак выплаты пэнсій дзяржаўным службоўцам

Дзяржаўныя службоўцы, якія дасягнулі пэнсійнага веку, змогуць атрымліваць пэнсію за выслугу гадоў, нават калі яны працягваюць працаваць на дзяржаўнай службе, паводле працоўнага кантракту, як індывідуальныя прадпрымальнікі, юрысты або натарыюсы.

Раней такія пэнсійныя выплаты прыпыняліся, калі чалавек працягваў працаваць. Пасьля ўнясеньня зьмяненьняў у закон пэнсію такім асобам будуць плаціць у поўным аб’ёме незалежна ад статусу занятасьці.

Скончацца абмежаваньні ў Латвіі

4 студзеня 2026 году ў Латвіі скончыцца забарона на палёты ўздоўж мяжы зь Беларусьсю і Расеяй. Забарона распаўсюджваецца на вечаровыя і начныя гадзіны.

Аднак няма гарантыі, што пасьля 4 студзеня ўсе абмежаваньні здымуць. Раней Латвія неаднаразова падаўжала такую забарону, беручы пад увагу напружанае становішча са спробамі нелегальнага перасячэньня мяжы зь беларускага боку.

Увосень Латвія зноў працягнула забарону, якая якраз дзейнічае да 4 студзеня. Парлямэнт Латвіі яшчэ будзе разглядаць пытаньне падаўжэньня або скасаваньня абмежаваньняў на палёты ўздоўж мяжы.

Новыя абмежаваньні для індывідуальных прадпрымальнікаў

Індывідуальныя прадпрымальнікі ў Беларусі больш ня змогуць працаваць ва ўсіх сфэрах. Віды дзейнасьці, якімі могуць займацца ІП, цяпер акрэсьлівае Дадатак № 1 да пастановы Савету Міністраў № 457 ад 28 чэрвеня 2024 году «Аб відах індывідуальнай прадпрымальніцкай дзейнасьці». Калі від дзейнасьці ня ўключаны ў гэты сьпіс, працягваць працу ў рамках ранейшага статусу не атрымаецца.

У такім выпадку трэба будзе альбо спыніць дзейнасьць індывідуальнага прадпрымальніка, альбо перайсьці ў фармат юрыдычнай асобы, альбо выбраць іншы спосаб працаўладкаваньня — напрыклад, самазанятасьць, калі гэта дазволена законам для абранага віду дзейнасьці.

Напрыклад, з 1 студзеня ІП ня змогуць займацца гуртавым і раздробным гандлем аўтамабілямі і матацыкламі, гуртавым гандлем (за выключэньнем аўтамабіляў/матацыклаў), капіяваньнем і афармленьнем дакумэнтаў, дзейнасьцю ў галіне выканальніцкага мастацтва і арганізацыяй культурных і забаўляльных мерапрыемстваў.

Падвышэньне падаткаў

Падатковыя стаўкі ў абсалютных значэньнях будуць індэксаваныя з улікам прагнознага ўзроўню інфляцыі. Гэта закране наступныя віды падаткаў:

• зямельны;
• на маёмасьць;
• экалягічны;
• на азартныя гульні;
• на транспарт;
• з асабістых даходаў.

З 1 студзеня ў Беларусі таксама чакаецца павышэньне ставак падаходнага падатку для высокіх даходаў. Стаўка ў 13% застанецца для даходаў да 350 000 рублёў, 25% — для даходаў у межах ад 350 000 да 600 000 рублёў і 30% — для сумаў звыш 600 000 рублёў. Стаўкі падатку на дывідэнды таксама былі перагледжаныя: 13% для даходаў да 350 000 рублёў і 25% для даходаў, якія перавышаюць гэтую суму.

Акрамя таго, мінімальная сума падатку з прафэсійных даходаў для самазанятых складзе 45 рублёў у месяц. Гэта азначае, што сума падатку будзе разьлічвацца на аснове даходу, але калі яна будзе меншай за 45 рублёў, усё роўна давядзецца заплаціць 45.

З 1 студзеня зьменіцца падаткаабкладаньне падарункаў ад фізычных асобаў. Неабкладаная сума падзеленая на дзьве катэгорыі: падарункі, атрыманыя ў Беларусі, і падарункі з-за мяжы. Для кожнай катэгорыі ліміт складае 6000 рублёў у год.

Падатак не спаганяецца з падарункаў ад блізкіх сваякоў, апекуноў, давераных асобаў або падапечных. Пры гэтым сума падарункаў не павінна быць зьвязанай з прадпрымальніцкай дзейнасьцю, інакш яна будзе абкладацца пададаткам з даходаў.

Новыя правілы для электрамабіляў і гібрыдаў

У 2026 годзе заахвочваньні для куплі і карыстаньня электрамабілямі застануцца ў сіле, але адбудуцца зьмены для сэрыйных гібрыдаў: імпартэры будуць павінны плаціць 15% мыта і 20% ПДВ, што павялічыць іх кошт. Нулявая стаўка ПДВ цяпер распаўсюджваецца толькі на электрамабілі з чыста электрычным рухавіком, якім ня больш за 5 гадоў.

Дармовая паркоўка для электрамабіляў скасоўваецца, але плаціць за зарадку на адмысловых станцыях ня трэба.

Для юрыдычных асобаў спрашчаюцца ўмовы для будаўніцтва і перадачы зарадных станцый, а таксама для прымянення інвестыцыйных вылічэнняў.

Абавязковае маркаваньне ювэлірных вырабаў

З 1 студзеня ў Беларусі ўводзіцца абавязковае маркаваньне ювэлірных вырабаў. Яно будзе патрабавацца пры стварэньні ювэлірных вырабаў у Беларусі, іх імпарце на продаж і экспарце ў краіны, зь якімі падпісаныя пагадненьні аб узаемным прызнаньні маркіроўкі.

Новыя правілы павінны зрабіць рынак больш празрыстым і скараціць незаконны гандаль, мяркуюць улады.

Новы падыход да кніг заўваг і прапаноў

Кнігу заўваг і прапаноў з новага году трэба будзе выдаваць наведнікам адкрытай на чыстай старонцы — яны ня змогуць бачыць, што напісалі іншыя людзі.

Кнігу заўваг і прапаноў, як вядома, трэба даваць на першы запыт. Забараняецца прасіць у наведнікаў дакумэнты або пытацца, чаму яны вырашылі пакінуць заўвагу.

Кніга абавязковая для большасьці арганізацый і індывідуальных прадпрымальнікаў, у той час як натарыюсы вызваленыя ад абавязку яе трымаць. Абавязаныя весьці кнігу заўваг і прапаноў, як і раней, жыльлёвыя каапэратывы, домаўладальніцкія асацыяцыі, прыватныя мэдыцынскія работнікі, спартовыя і культурніцкія цэнтры.

«Белавія» адновіць палёты ў Тэль-Авіў з 8 студзеня

Нацыянальная авіякампанія «Белавія» абвясьціла аб аднаўленьні з 8 студзеня 2026 году рэгулярных рэйсаў у Тэль-Авіў. Як адзначае прэс-служба перавозьніка, рэйсы ў Ізраіль будуць выконвацца два разы на тыдзень, у чацьвер і нядзелю: вылет зь Менску — а 07:10, прыбыцьцё — а 12:20; вылет з Тэль-Авіву — а 13:15, прыбыцьцё — а 20:40.

Працягласьць палёту складзе 6 гадзін 10 хвілін і 6 гадзін 25 хвілін адпаведна.

Рэйсы будуць выконвацца на самалётах «Боінг 737-8».

Пачне працу Апэляцыйны эканамічны суд

Указ пра стварэньне Апэляцыйнага эканамічнага суду падпісалі 3 красавіка 2025 году. Будынак суду ў Менску адкрыўся 3 сьнежня.

Старшынём Апэляцыйнага эканамічнага суду прызначаны Юры Кобец, якога вызвалілі ад пасады намесьніка старшыні Вярхоўнага суду.

Пачне працаваць суд 1 студзеня 2026 году, калі набудзе моц Кодэкс грамадзянскага судаводзтва.