Пра гэта піша інфармацыйнае агенцтва Bloomberg.
У мінулыя выходныя адміністрацыя ЗША Дональда Трампа пагадзілася скасаваць абмежаваньні на беларускія калійныя ўгнаеньні — найважнейшую крыніцу даходу дзяржавы да ўвядзеньня заходніх санкцыяў. Рашэньне было прынятае пасьля перамоваў паміж спэцыяльным пасланьнікам прэзыдэнта Трампа па Беларусі Джонам Коўлам і беларускім лідэрам Аляксандрам Лукашэнкам, які ў межах дамоўленасьці распарадзіўся вызваліць 123 палітвязьняў — адзначае Bloomberg.
Акцыі амэрыканскіх вытворцаў угнаеньняў упалі. Паперы Nutrien Ltd зьнізіліся на 5,6% — гэта самае рэзкае ўнутрыдзённае падзеньне больш чым за восем месяцаў. Акцыі Mosaic Co. праселі на 4,2%.
Дзяржаўная беларуская кампанія «Беларуськалій», расейская Uralkali PJSC, а таксама Nutrien і Mosaic — чатыры найбуйнейшыя пастаўшчыкі на сусьветным рынку.
Таргі акцыямі эўрапейскіх вытворцаў угнаеньняў былі больш спакойнымі: Yara International ASA вырасла на 0,6%, а K + S AG засталася без зьменаў.
ГЛЯДЗІЦЕ ТАКСАМА: 100 мільёнаў даляраў. Як выглядаў гандаль каліем паміж Беларусьсю і ЗША да санкцыяў і што будзе заразХоць Беларусь, імаверна, паспрабуе вярнуцца на амэрыканскі рынак, шмат што залежыць ад лягістыкі паставак. Санкцыі Эўразьвязу застаюцца ў сіле, а ў краіны няма ўласных марскіх партоў, таму ёй па-ранейшаму даводзіцца абапірацца на расейскія балтыйскія тэрміналы і чыгуначны экспарт у Кітай.
Найбуйнейшы гандлёвы маршрут праз літоўскі порт Клайпеда, праз які раней адпраўлялася больш за 90% беларускага калію, зачынены з 2022 года.
Зьняцьцё санкцый ЗША «спрасьціць закулісную частку гандлю», уключаючы страхаваньне і крэдытаваньне, аднак лягістычныя цяжкасьці, якія захоўваюцца, не далі акцыям кампаній зрабіць больш рэзкі рывок, заявіла Алексіс Максуэл, аналітык Bloomberg Intelligence.
Зрух у палітыцы не павінен выклікаць значнай фундамэнтальнай рэакцыі на рынку ЗША, паколькі невялікую долю беларускіх паставак лёгка замянілі пасьля ўварваньня Расеі ва Ўкраіну ў 2022 годзе, сказаў Джош Лінвіл, віцэ-прэзыдэнт па ўгнаеньнях у кампаніі StoneX Group.
ГЛЯДЗІЦЕ ТАКСАМА: Гандаль людзьмі і каліем: як Лукашэнка выкарыстоўвае вызваленьне палітвязьняўЗША амаль цалкам імпартуюць калій з Канады — паставак, якія могуць апынуцца пад пагрозай, калі Трамп выканае намер увесьці магчымыя тарыфы на канадзкія ўгнаеньні, аб якіх ён заявіў на мінулым тыдні.
Па дадзеных Bloomberg Intelligence, экспарт калію з Беларусі ў мінулым годзе склаў 88% ад дасанкцыйнага ўзроўню, паколькі вытворца выкарыстаў больш дарагія маршруты праз Расею. Любое павелічэньне паставак у ЗША можа прымусіць Беларусь скараціць продажы на іншых рынках, што зьмякчыць агульны ўплыў на цэны, адзначыў Алан Пікет, кіраўнік групы аналізу рынку ўгнаеньняў у S&P Global Energy.
«Паколькі яны практычна вярнулі сабе долю на сусьветным рынку, гэта азначае, што калі яны будуць пастаўляць больш у ЗША, то, імаверна, будуць пастаўляць менш у іншыя рэгіёны, — сказаў Пікет. — Балянс істотна не мяняецца, а значыць, уплыў на сусьветныя цэны застаецца невялікім».