Дата дня
14 сьнежня 1989 году ад інфаркту памёр Андрэй Сахараў, савецкі дысыдэнт і праваабаронца. Адзін са стваральнікаў першай савецкай вадароднай бомбы, выпрабаваньне якой адбылося ў 1953 годзе. Сахараў узначальваў фонд дапамогі дзецям палітвязьняў і бараніў правы чалавека, за што ў 1975 годзе атрымаў Нобэлеўскую прэмію міру.
Прэмія імя Сахарава «За свабоду думкі», заснаваная Эўрапейскім Парлямэнтам у 1988 годзе, — найвышэйшая ўзнагарода Эўрапейскага Зьвязу за праваабарончую дзейнасьць. Сёлета прэмію імя Сахарава атрымалі зьняволеныя журналісты Анджэй Пачобут зь Беларусі і Мзія Амаглабэлі з Грузіі.
Таксама ў гэты дзень
1586 — у Горадні зробленае першае ў гісторыі ВКЛ мэдычнае ўскрыцьцё цела нябожчыка, караля і вялікага князя Стэфана Баторыя
Партрэт Стэфана Баторыя
1782 — браты Мангальф’е запусьцілі першы ў сьвеце паветраны шар.
1825 — група рэвалюцыйна настроеных расейскіх афіцэраў у Санкт-Пецярбургу паўстала супраць царызму.
1862 — у Менску было відаць паўночнае зьзяньне. Пазьней Уладзімер Караткевіч назваў гэтую зьяву «прадвесьцем будучай бітвы», маючы на ўвазе паўстаньне Каліноўскага, якое пачалося праз год.
1939 — Савецкі Саюз выключылі зь Лігі Нацыяў за напад на Фінляндыю.
1957 — у газэце «Літаратура і мастацтва» зьявіўся артыкул студэнта факультэту журналістыкі БДУ Барыса Сачанкі «Шанаваць родную мову». Гэта быў першы ў Беларусі публічны выступ супраць русыфікацыі за амаль 30 гадоў.
Барыс Сачанка
1993 — антыкарупцыйны даклад дэпутата Аляксандра Лукашэнкі ў Вярхоўным Савеце Беларусі.
ГЛЯДЗІЦЕ ТАКСАМА: 1993: Антыкарупцыйны даклад Лукашэнкі пісалі людзі Кебіча2004 — Беларуская асацыяцыя журналістаў атрымала Прэмію за свабоду думкі імя А. Сахарава.
У гэты дзень нарадзіліся
1503 — Настрадамус, францускі лекар, астроляг і прадказальнік.
1546 — Тыха Браге, дацкі шляхціц, сёньня найбольш вядомы як адзін зь першых астраномаў у Эўропе.
Тыха Браге
1738 — Ян Мікалай Хадкевіч, дзяржаўны і вайсковы дзяяч Вялікага Княства Літоўскага.
1890 — Іван Гаўрыс, мастак Віцебскай школы, удзельнік руху УНОВІС (з расейскай мовы «Утвердители нового искусства»), ахвяра сталінізму.
1905 — Мікалай Дарожкін, беларускі міколяг і фітапатоляг, акадэмік АН БССР.
1912 — Уладзімер Кароль, беларускі архітэктар, суаўтар праектаў праспэкту Незалежнасьці, манумэнта Перамогі і будынка Галоўпаштамту ў Менску.
У памяці
1799 — Джордж Вашынгтон, першы прэзыдэнт ЗША.
Партрэт Джорджа Вашынгтана на купюры ў адзін даляр
1941 — Эдуард Вольтэр, этнограф, аўтар кнігі «Матэрыялы да этнаграфіі латыскага племені Віцебскай губэрні».
2001 — Самсон Пярловіч, паэт, дзяяч беларускага супраціву, вязень ГУЛАГу.