У турмах і сьледчых ізалятарах Беларусі ўтрымліваецца больш за 1100 чалавек, якіх праваабаронцы лічаць палітычнымі зьняволенымі.
Раней Марыне Золатавай за мужнасьць прысудзілі міжнародную прэмію Ёгана-Філіпа Пальма.
«Кожны дзень у няволі — гэта вельмі цяжка»
Першыя словы Марыны Золатавай на волі запісаў украінскі праект Каардынацыйнага штаба па пытаньнях стаўленьня да палонных «Хочу жить».
«Мяне завуць Марына Золатава. Я была галоўным рэдактарам партала Tut.by. Чатыры з паловай гады прайшло з таго часу, як мяне затрымалі. Тэрмін мне далі 12 гадоў. Я цешуся, што выйшла не праз 12 гадоў, а праз чатыры з паловай хаця б. Я спадзяюся, што ў бліжэйшы час я здолею абняць сваіх родных, і ўдзячная ўсім тым, хто ўзяў удзел у нашым датэрміновым вызваленьні, бо кожны дзень у няволі гэта вельмі цяжка», — сказала Марына Золатава.
Яна дадала, што ёй разам з тым вельмі сумна ад таго, што яшчэ вельмі шмат чалавек засталіся ў зьняволеньні, прынамсі ў жаночай калёніі ў Гомлі.
«Сярод іх шмат жанчын пажылога ўзросту, з праблемамі са здароўем, таму з аднаго боку радасна, што здолею абняць родных і блізкіх, зь іншага – вельмі горка, што яшчэ многа жанчын знаходзіцца ў калёніі», — сказала Марына Золатава ў першыя хвіліны на волі.
Перасьлед Марыны Золатавай
Марыну Золатаву затрымалі 18 траўня 2021 году. У сакавіку 2023-га яе разам з гендырэктарам Людмілай Чэкінай суд пакараў 12 гадамі пазбаўленьня волі. Тэрмін яны адбывалі ў калёніі ў Гомлі.
Паводле «Рэпартэраў бязь межаў», Беларусь займае 4-е месца ў сьвеце ў колькасьці зьняволеных журналістаў. Паводле БАЖ, у зьняволеньні цяпер 28 прадстаўнікоў беларускіх СМІ.
У кастрычніку 2022 году Золатаву, Чэкіну, Лойку і Талкачову КДБ унёс у пералік асоб, «датычных да тэрарыстычнай дзейнасьці».
Агулам у «справе Tut.by» былі затрыманыя 15 чалавек. Зь цягам часу агульная колькасьць абвінавачаных скарацілася да пяці (Золатава, Чэкіна, Лойка, Талкачова, Ткачэнка), пазьней пад вартай засталіся двое (Золатава і Чэкіна).
Найбуйнейшы недзяржаўны інтэрнэт-партал Беларусі Tut.by быў разгромлены ўладамі ў траўні 2021 году. Частка каманды, якая засталася на волі, пакінула краіну і ў ліпені таго ж году стварыла праект Zerkalo.io, які прытрымліваецца традыцый Tut.by. У Беларусі і Расеі доступ да сайту заблякаваны. Кантэнт сайту ў Беларусі прызнаны «экстрэмісцкімі матэрыяламі».
Трэцяга сьнежня 2020 году Эканамічны суд Менску пазбавіў партал Tut.by статусу СМІ, 14 чэрвеня 2022 году — прызнаў ТАА «Тут Бай Медыя» «экстрэмісцкай арганізацыяй».
У чэрвені 2023 году Лойка заснавала на эміграцыі аўтарскі мэдыяпраект Plan B, які асьвятляе падзеі ў Беларусі.
Сотні беларускіх рэпартэраў прайшлі праз арышты, дзясяткі застаюцца ў турмах. Усе незалежныя мэдыя, якія асьвятляюць грамадзка-палітычныя падзеі ў Беларусі, цяпер працуюць выключна з-за мяжы.
ГЛЯДЗІЦЕ ТАКСАМА: Беларусь трапіла на 4‑е месца ў сьвеце па колькасьці зьняволеных журналістаў