Аляксандар Лукашэнка сваім новым указам зьмяніў дату ўвядзеньня Нацыянальнага футбольнага стадыёну, які будуецца з 2020 году з удзелам інвэстыцый Кітаю.
Як адзначаецца ў апублікаваным на Нацыянальным прававым інтэрнэт-партале Беларусі дакумэнце, цяпер датай увядзеньня стадыёну і аб’ектаў у эксплуатацыю будзе лічыцца «дата падпісаньня акту тэхнічнай перадачы».
Будаўніцтва ўсіх іншых аб’ектаў, якія ўваходзяць у комплекс, павінны завяршыць да 1 кастрычніка 2025 году.
Прадугледжваецца, што для інжынэрна-тэхнічнага і юрыдычнага суправаджэньня праекту, у тым ліку, для гарантыйнага абслугоўваньня стадыёну і аб’ектаў, будзе створана адмысловы структурны падразьдзел.
ГЛЯДЗІЦЕ ТАКСАМА: Менскія ўлады паказалі праект «кітайскага» футбольнага стадыёну. ФОТАГэта другі перанос тэрміну ўвядзеньня аб’екту. Першапачаткова стадыён плянавалі здаць да канца 2023 году, а потым — да канца 2024 году. Сёлета на стадыёне плянавалі правесьці фінал Кубку Беларусі, а таксама таварыскі матч паміж Беларусьсю і Расеяй.
30 чэрвеня 2020 году ў Менску на стадыёне «Дынама» правялі ўрачыстую цырымонію з удзелам кітайскіх дыпляматаў і беларускіх чыноўнікаў з нагоды пачатку будаўніцтва ў Менску за кітайскія грошы Нацыянальнага футбольнага стадыёну і басэйн міжнароднага стандарту.
ГЛЯДЗІЦЕ ТАКСАМА: Снапкоў заявіў пра «дыпляматычны геній» Лукашэнкі пасьля пачатку будаўніцтва кітайскага стадыёна ў МенскуЯк вынікала з афіцыйных заяваў, на будаўніцтва двух аб’ектаў Кітай выдзеліў Беларусі 240 мільёнаў даляраў.
Басэйн адкрылі летась 6 лістапада, хоць першапачаткова таксама плянавалі здаць у 2023 годзе. У афіцыйнай цырымоніі ўдзельнічаў Аляксандар Лукашэнка — ён тады заявіў, што будаўніцтва футбольнага стадыёну завершыцца неўзабаве.
ГЛЯДЗІЦЕ ТАКСАМА: Лукашэнка адкрыў у Менску «кітайскі» басэйн