Таксама Расея можа задумацца аб прымяненьні ядзернай зброі пасьля атрымання дакладных звестак аб масіраваным удары варожых ракет і бесьпілётнікаў па сваёй тэрыторыі. Навошта гэтыя зьмены спатрэбіліся менавіта цяпер, да чаго яны могуць прывесьці і хто або што можа спыніць ядзерную пагрозу з боку Расеі?
Глядзіце інтэрвію з Максімам Старчакам, экспэртам у расейскай ядзернай зброі, навуковым супрацоўнікам Цэнтру міжнароднай і абароннай палітыкі Ўнівэрсытэту Queen’s у Канадзе.
На думку экспэрта, гэта чарговая спроба напалохаць Захад і ўнесьці ва ўкраінска-расейскі канфлікт ядзерны фактар. Гэта спроба заявіць Захаду, што ў выпадку неабходнасьці Расея будзе здольная выкарыстаць ядзерную зброю.
«Пуцін гэтым разам афіцыйна заявіў, што Беларусь знаходзіцца пад поўным ядзерным парасонам Расейскай Фэдэрацыі. Раней гэтага афіцыйна ня было. Гаворка раней ішла, што Беларусь можа быць абароненая ядзернымі ракетамі РФ, калі на Беларусь будзе ўчынены напад балістычнымі ракетамі або іншай зброяй масавага паражэньня. А цяпер Пуцін кажа, што любы напад на Беларусь можа мець ядзерны адказ» — гаворыць Старчак.
Разьмяшчэньне расейскай ядзернай зброі ў Беларусі ня мае вялікага вайсковага значэньня, перакананы экспэрт. Ён называе гэта дадатковаым палітычным крокам Расеі і Беларусі, каб аказаць ціск на Захад і ЗША, унесьці ў канфлікт ядзерны факт.
«Магчыма яны чакалі, што Захад таксама адкажа чымсьці ядзерным і тады б узьнікла нагода для перамоваў і дамоваў. Але адказу на гэты крок яны не атрымалі. Таму гэты крок аказаўся абсалютна пустым», — лічыць Максім Старчак.