«Гэта сыгнал Маскве». Навошта Лукашэнку Пяткевіч, Рыжанкоў, Круты

Палітычны аналітык Аляксандар Марозаў у інтэрвію «ПіКу Свабоды» камэнтуе сёньняшнія прызначэньні Лукашэнкам палітыкаў «маладога пакаленьня», а таксама разважае пра інфармацыю ад расейскага палітоляга Яўгенія Мінчанкі пра далучэньне Лукашэнкі да «новага Палітбюро» ў Расеі і аналізуе, што можа даць Беларусі сяброўства ў ШАС і BRICS.

27 чэрвеня Аляксандар Лукашэнка зрабіў кадравыя прызначэньні ва ўрадзе і ў сваёй адміністрацыі. Кіраўніком сваёй адміністрацыі Лукашэнка прызначыў Дзьмітрыя Крутога, які быў амбасадарам Беларусі ў Маскве. Першай намесьніцай кіраўніка адміністрацыі Лукашэнка прызначыў Натальлю Пяткевіч, якая апошнія гады жыла ў ЗША. Міністрам замежных спраў Лукашэнка прызначыў Максіма Рыжанкова.

Цалкам размову глядзіце ў відэафармаце на Youtube.

Марозаў: Сёньняшнія перастаноўкі Лукашэнкі не настолькі зьвязаныя зь ягоным чарговым тэрмінам. Хутчэй яны зьвязаныя з тым, што Лукашэнка хоча прадэманстраваць, як ён часта гэта робіць, што ён разумее перамены, якія адбыліся ў Расеі, у крамлёўскай палітыцы. Гэтыя зьмены адбыліся ў пачатку новай кадэнцыі Пуціна. І Лукашэнка паказвае, што знаходзіцца на агульнай хвалі, праводзіць, як і Пуцін, пэўную мабілізацыю вакол сябе максымальна ляяльных і эфэктыўных чыноўнікаў на новы тэрмін доўгай вайны.