Праз электронны аўкцыён «БелЮрЗабесьпячэньне» прадаюць нерухомасьць, якая належыць двум палітзьняволеным праваабаронцам «Вясны» — Валянціну Стэфановічу і Ўладзімеру Лабковічу, заўважыла выданьне «Люстэрка».
Так, на таргі выставілі двухпакаёвую кватэру ў доме №43 па вуліцы Тухачэўскага ў Менску, якая належыць юрысту праваабарончага цэнтру «Вясна» і каардынатару кампаніі «Праваабаронцы за свабодныя выбары» Уладзімеру Лабковічу.
Кватэра агульнай плошчай 43,9 м² арыштаваная па рашэньні сьледзтва. Пачатковы кошт кватэры — 134 000 рублёў. Калі знойдуцца ахвотнікі купіць яе, таргі пройдуць 23 красавіка.
ГЛЯДЗІЦЕ ТАКСАМА: 36 праваабарончых арганізацый выступілі з заявай у гадавіну суду над праваабаронцамі «Вясны»Яшчэ адзін лот — 1/7 долі адміністрацыйнага памяшканьня ў Менску, на вуліцы Ложынскай, 16. Яна лічыцца за сябрам рады «Вясны», віцэ-прэзыдэнтам Міжнароднай фэдэрацыі за правы чалавека (FIDH) Валянцінам Стэфановічам.
Агульная плошча памяшканьня — 92,1 м², пачатковая цана маёмасьці — 33 300 рублёў, таргі прызначаны на 23 красавіка.
У «Вясне» паведамілі, што памяшканьне на вуліцы Ложынскай належыць сямі чальцам праваабарончай арганізацыі, раней яго выкарыстоўвалі для правядзеньня бясплатных івэнтаў — лекцый, дыскусій, выставаў.
ГЛЯДЗІЦЕ ТАКСАМА: «Вясна» атрымала прэмію ААН у галіне правоў чалавека за 2023 год- 23 жніўня 2023 году МУС Беларусі прызнала праваабарончы цэнтар «Вясна» «экстрэмісцкім фармаваньнем». У міністэрстве лічаць, што арганізацыя займалася дзейнасьцю «ў падрыхтоўцы замахаў на сувэрэнітэт і грамадзкую бясьпеку Рэспублікі Беларусь», а таксама дыскрэдытавала службовых асобаў.
- Стэфановіч і Лабковіч — сябры праваабарончага цэнтру «Вясна». Іх, як і старшыню «Вясны», ляўрэата Нобэлеўскай прэміі міру Алеся Бяляцкага, асудзілі на працяглыя тэрміны зьняволеньня.
- Уладзімера Лабковіча затрымалі 14 ліпеня 2021 году. Яму выставілі абвінавачаньні паводле арт. 228 КК Беларусі («Кантрабанда») і ч. 2 арт. 342 КК Беларусі («Фінансаваньне групавых дзеяньняў, якія груба парушаюць грамадзкі парадак») і прыгаварылі да 7 гадоў зьняволеньня ў калёніі ўзмоцненага рэжыму. У сьнежні 2023 году МУС дадало Лабковіча ў «сьпіс экстрэмістаў».
- Валянціна Стэфановіча затрымалі 14 ліпеня 2021 году, судзілі па тых самых артыкулах, што і Лабковіча. Суд прыгаварыў праваабаронцу да 9 гадоў зьняволеньня ў калёніі ўзмоцненага рэжыму. Пазьней МУС дадало Валянціна ў «сьпіс экстрэмістаў». Са сьнежня мінулага году яго на паўгода перавялі ў памяшканьне камэрнага тыпу «за парушэньні».
Перасьлед Праваабарончага цэнтру «Вясна»
Па стане на 3 сакавіка 2024 году, за кратамі знаходзяцца 5 праваабаронцаў «Вясны».
- Алесь Бяляцкі, старшыня «Вясны», затрыманы 14 ліпеня 2021. Падчас ягонага зьняволеньня, 7 кастрычініка 2022 году, Алесю Бяляцкаму была прысуджаная Нобэлеўская прэмія міру. 3 сакавіка 2023 году яго асудзілі на 10 гадоў калёніі. Бяляцкага прызналі вінаватымі ў «кантрабандзе грошай арганізаванай групай» у 2016–2021 гадах (ч. 4 арт. 228 КК) і «фінансаваньні пратэстаў» у 2020-м (ч. 2 арт. 342 Крымінальнага кодэксу).
- Валянцін Стэфановіч, намесьнік старшыні «Вясны» і віцэ-прэзыдэнт FIDH, затрыманы 14 ліпеня 2021-га. 3 сакавіка 2023 году яго асудзілі на 9 гадоў зьняволеньня. Яго прызналі вінаватымі ў «кантрабандзе грошай арганізаванай групай» у 2016–2021 гадах (ч. 4 арт. 228 КК) і «фінансаваньні пратэстаў» у 2020-м (ч. 2 арт. 342 Крымінальнага кодэксу).
- Уладзімер Лабковіч, юрыст «Вясны», затрыманы 14 ліпеня 2021 г. 3 сакавіка 2023 году яго асудзілі на 7 гадоў зьняволеньня. Яго прызналі вінаватымі ў «кантрабандзе грошай арганізаванай групай» у 2016–2021 гадах (ч. 4 арт. 228 КК) і «фінансаваньні пратэстаў» у 2020-м (ч. 2 арт. 342 Крымінальнага кодэксу).
- Марфа Рабкова, праваабаронца «Вясны», затрыманая 17 верасьня 2020 году. Ёй прысудзілі 15 гадоў калёніі ва ўмовах агульнага рэжыму і штраф у памеры 700 базавых велічыняў (22 400 беларускіх рублёў, або звыш 8800 даляраў) паводле ч. 3 арт. 293 Крымінальнага кодэксу («навучаньне ці іншая падрыхтоўка асобаў для ўдзелу ў масавых беспарадках, альбо фінансаваньне такой дзейнасьці»), ч. 3 арт. 130 («распальваньне сацыяльнай варожасьці да ўлады») і ч. 2 арт. 285 КК («ўдзел у злачыннай арганізацыі»). 28 лютага 2023 году Вярхоўны суд Беларусі разгледзеў апэляцыйную скаргу ў справе Рабковай. Тэрмін зьняволеньня скарацілі на тры месяцы.
- Андрэй Чапюк, валянтэр «Вясны» зь Менску, затрыманы 2 кастрычніка 2020-га. Яго абвінавачвацілі ва ўдзеле ў масавых беспарадках і ўдзеле ў злачыннай арганізацыі. Чапюка асудзілі на 6 гадоў калёніі ва ўмовах узмоцненага рэжыму і пакаралі штрафам у памеры 500 базавых велічыняў (16 000 беларускіх рублёў ці больш за 6 300 даляраў);
- Леанід Судаленка, дырэктар гомельскага аддзяленьня «Вясны», затрыманы 18 студзеня 2021-га. Паводле артыкулу аб масавых беспарадках яго пакаралі на 3 гады зьняволеньня.
Выйшла на волю:
- Тацьцяна Ласіца, валянтэрка «Вясны» з Гомля, затрыманая 21 студзеня 2021. Паводле артыкулу аб масавых беспарадках за кратамі прабыла 1 год і 8 месяцаў. Праваабаронца не адбыла ўвесь тэрмін.