У Менску адбылося першае пасяджэньне супольнай міжведамаснай камісіі ў вайсковай супрацы Беларусі і Ірана.
Як паведаміла прэсавая служба Міністэрства абароны Беларусі, беларускую частку камісіі ачольваў першы намесьнік міністра абароны Андрэй Маціевіч, іранскую — начальнік дэпартамэнту міжнародных дачыненьняў Генэральнага штабу Ўзброеных сіл Ісламскай Рэспублікі Магамад Ахадзі.
«У часе пасяджэньня бакі абмеркавалі стан і пэрспэктывы разьвіцьця супрацы Рэспублікі Беларусь і Ісламскай Рэспублікі Іран у вайсковай сфэры, а таксама ўзгаднілі плян супольных мерапрыемстваў на 2024 год», — адзначаецца ў паведамленьні Мінабароны.
Сёлета ў кастрычніку ў Беларусь зь візытам прыяжджаў першы віцэ-прэзыдэнт Ірану Магамад Махбэр. Ён сустрэўся з Аляксандрам Лукашэнкам і кіраўніком ураду Раманам Галоўчанкам.
ГЛЯДЗІЦЕ ТАКСАМА: Іран прапанаваў Беларусі адмовіцца ад «варожых валют» ва ўзаемным гандлі і выкарыстоўваць «іранскі калідор» для экспартуІран шмат гадоў жыве ва ўмовах жорсткага санкцыйнага рэжыму. Больш жорсткага, чым той, у якім цяпер апынулася Беларусь. Прычына — другасныя санкцыі. Беларусь раней асьцерагалася ісьці на актыўнае эканамічнае супрацоўніцтва з Іранам, бо была рызыка трапіць пад гэтыя другасныя заходнія санкцыі. Цяперашняе ўзмацненьне ізаляцыі Беларусі спрыяе новым пашыраным кантактам з Іранам.
Аляксандар Лукашэнка тройчы наведваў Іран — у 1998, 2006 і ў 2023 гадах. У 2004 годзе Менск наведаў прэзыдэнт Ірану Магамад Хатамі, у 2007 годзе — Махмуд Ахмадзінэжад.
У 2015 годзе Лукашэнка сустракаўся з прэзыдэнтам Ірану Хасанам Рухані на саміце BRICS і ШАС, зь ім жа — на саміце ШАС у 2018 годзе, і ў 2019 годзе — на саміце Расеі, Турэччыны і Ірану аб крызісе ў Сырыі.
ГЛЯДЗІЦЕ ТАКСАМА: З кім сябруе Беларусь на Блізкім Усходзе? ІнфаграфікаУ 2021 годзе Лукашэнка на саміце ШАС сустрэўся з новым прэзыдэнтам Ірану Эбрагімам Раісі. Чакаецца, што налета Раісі наведае зь візытам Беларусь.
ГЛЯДЗІЦЕ ТАКСАМА: Што вядома пра эканамічныя сувязі Беларусі з Іранам і Вэнэсуэлай