Беларусы Вільні выйшлі на пратэст да Сейму Літвы супраць дыскрымінуючага закону. У гэты час у літоўскім парлямэнце паўторна галасавалі ў справе закону аб санкцыях адносна грамадзян Беларусі і Расеі. У выніку Сейм Літвы пераадолеў вэта прэзыдэнта.
«Беларусь не Расея». Як беларусы пратэставалі калі літоўскага Сейму. Фотарэпартаж
Беларускія актывісты выйшлі на акцыю пратэсту да Сейму супраць дыскрымінуючага закону Літвы адносна санкцый да беларусаў і расейцаў.
«Беларусь не Расея» — асноўны лёзунг акцыі. Гэта зьвязана са словамі прэзыдэнта Літвы Наўседы: «Няма падстаў вызначаць розныя прававыя нормы для грамадзян дзьвюх дзяржаў-агрэсараў, і прапануе прымяняць аднолькавыя абмежавальныя захады да грамадзян абедзьвюх дзяржаў».
Сейм Літвы прыняў згаданы закон 4 красавіка. Ён прадугледжвае абмежавальныя меры для грамадзян Беларусі і РФ, зьвязаныя з парадкам уезду і легалізацыі ў гэтай балтыйскай дзяржаве, набыцьця нерухомасьці ды інш. На этапе разгляду дакумэнт быў значна зьмякчаны ў дачыненьні да беларусаў, большасьць санкцый закранула расейцаў.
14 красавіка прэзыдэнт Гітанас Наўседа наклаў на закон вэта. Ён прапанаваў парлямэнту «цалкам прымяніць усе сем абмежавальных мер да грамадзян Беларусі і Расеі» і ўніфікаваць абмежаваньні, якія прымяняюцца як да расейцаў, так і да беларусаў.
За пераадоленьне вэта прэзыдэнта прагаласавалі 99 дэпутатаў са 108 прысутных.
У акцыі ўзялі ўдзел да 50 чалавек.