Генэральны пракурор Нямеччыны Петэр Франк заявіў 5 лютага, што яго ведамства сабрала «сотні» доказаў ваенных злачынстваў, учыненых расейскімі войскамі ва Ўкраіне.
«На дадзены момант мы сканцэнтраваны на масавых забойствах у Бучы і нападах на грамадзянскую інфраструктуру Ўкраіны», — сказаў Петэр Франк газэце Welt am Sonntag.
Паводле яго слоў, зараз стаіць задача «падрыхтавацца да магчымага далейшага судовага разгляду — альбо ў Нямеччыне, з нашымі замежнымі партнэрамі, альбо ў міжнародным судзе».
2 красавіка 2022 года Кіеўская вобласьць была вызваленая ад расейскіх войскаў. Пасьля адступленьня расейскіх вайскоўцаў у вызваленых гарадах і вёсках былі зафіксаваны масавыя забойствы мірнага насельніцтва.
Крэмль «катэгарычна адхіляе любыя абвінавачаньні ў забойствах мірных жыхароў», хоць факты забойства мірных жыхароў падчас расейскай акупацыі былі пацьверджаны спадарожнікавымі здымкамі.
ГЛЯДЗІЦЕ ТАКСАМА: У Гаазе будзе створаны міжнародны цэнтар па расьсьледаваньні злачынства агрэсіі ва Ўкраіне — кіраўніца Эўракамісіі