Прадстаўнік прэзыдэнта Ўкраіны ў Вярхоўнай Радзе Ўкраіны Фёдар Веніслаўскі заявіў, што для разьмяшчэньня місіі вайсковых назіральнікаў парлямэнт мусіць ухваліць адпаведны закон.
«Для разьмяшчэньня на тэрыторыі Ўкраіны вайсковых назіральнікаў, міратворцаў зь любой краіны сьвету нам не патрэбна згода ні Рэспублікі Беларусь, ні Расейскай Фэдэрацыі, бо гэта наша тэрыторыя і на сваёй тэрыторыі Ўкраіна мае права разьмяшчаць у тым ліку і прадстаўнікоў іншаземных вайсковых фармаваньняў», — сказаў Фёдар Веніслаўскі на брыфінгу ў Кіеве 25 кастрычніка.
Паводле яго, згодна з Канстытуцыяй Вярхоўная Рада Ўкраіны мусіць ухваліць адпаведны закон.
«Калі будзе такая неабходнасьць для разьмяшчэньня такога міратворчага кантынгенту, я перакананы, што прэзыдэнт Украіны ініцыюе такі законапраект, а Вярхоўная Рада хутка яго ўхваліць. І ніякіх праблем, каб мы маніторылі правакацыі з боку Расеі і Беларусі, няма», — падкрэсьліў дэпутат украінскага парлямэнту.
Фёдар Веніслаўскі заявіў, што пры неабходнасьці гэтае рашэньне будзе ўхвалена вельмі хутка.
«Усё залежыць ад таго, як будуць дасягнутыя дамоўленасьці з тымі, хто ў гэтую маніторынгавую місію ўвойдзе. Працэс ідзе. Я мяркую, што для таго, каб мы ўхвалілі рашэньне і яго рэалізавалі, не патрэбна шмат часу. Гэта ня месяцы. Гэта тыдні», — падкрэсьліў Прадстаўнік прэзыдэнта Ўкраіны ў Вярхоўнай Радзе Ўкраіны Фёдар Веніслаўскі.
Дыскусія аб міжнародных назіральніках
Прапанову разьмясьціць на мяжы міжнародных назіральнікаў прэзыдэнт Украіны Ўладзімір Зяленскі выказаў 12 кастрычніка, выступаючы перад лідэрамі краін G7. На яго думку, гэта дапаможа зьняць правакацыі і домыслы пра пагрозу Беларусі з боку Ўкраіны.
На прапанову Зяленскага апэратыўна адказаў дзяржаўны сакратар Рады Бясьпекі Беларусі Аляксандар Вальфовіч. Ён заявіў, што Беларусь у гэтым разьмяшчэньні ўдзельнічаць ня будзе, бо ёй гэта «ня трэба».
ГЛЯДЗІЦЕ ТАКСАМА:
Макей адказаў Зяленскаму: пры накіраваньні назіральнікаў на ўкраінска-беларускую мяжу мы павінны зрэагавацьПазьней міністар замежных спраў Беларусі Ўладзімір Макей заявіў, што знаходжаньне на ўкраінска-беларускай мяжы назіральнікаў з заходніх краін улады ў Беларусі будуць лічыць уцягваньнем Захаду ў вайну.
ГЛЯДЗІЦЕ ТАКСАМА:
Сакратар Рады бясьпекі Вальфовіч: Міжнародны кантынгент на мяжы нам не замінае, але і не патрэбныУлады Беларусі надалі сваю тэрыторыю Расеі для нападу на Ўкраіну ў лютым 2022 году, танкавыя калёны і самалёты тады перасяклі беларуска-ўкраінскую мяжу. Восеньню 2022 году расейскія войскі зноў прыбылі ў Беларусь нібыта ў рамках рэгіянальнай групоўкі войскаў Беларусі і Расеі.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, некаторыя яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага 2022 году Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 17 лістапада 2024 году тагачасны прэзыдэнт ЗША Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША прэзыдэнта Дональда Трампа рэзка актывізавалася тэма магчымых мірных перамоваў. Улетку 2025 году Дональд Трамп правёў шэраг сустрэчаў, у тым ліку з Уладзімірам Зяленскім і Ўладзімірам Пуціным. Аднак дамовіцца пра мірнае пагадненьне ці прынамсі пра асабістую сустрэчу прэзыдэнтаў Украіны і Расеі не атрымалася. Агулам мірныя перамовы дагэтуль не далі істотных вынікаў.
- 1 чэрвеня 2025 году на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- З пачатку 2024 году па цяперашні час украінскія дроны пашкодзілі мноства расейскіх нафаперапрацоўчых заводаў, што прывяло да істотнага скарачэньня вытворчасьці нафтапрадуктаў у Расеі.
- Лінія фронту ва Украіне на працягу 2025 і на пачатку 2026 году заставалася адносна стабільнай. Пры гэтым расейскія войскі павольна прасоўваліся на асобных участках. З кастрычніка 2025 па сакавік 2026 году Расея захапіла каля 1833 км². На пачатку 2026 году ўкраінскія сілы правялі шэраг удалых контратак. У канцы красавіка 2026 году ўпершыню за доўгі час Ўкраіна адваявала больш тэрыторыі, чым страціла.
Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.